काठमाडौं । लगातारको वर्षासँगै आएको बाढी र पहिरोका कारण देशका विभिन्न स्थानमा प्रमुख राजमार्ग तथा सडकखण्डहरू अवरुद्ध भएका छन्। नेपाल प्रहरीले आइतबार बिहान ५ बजेसम्मको विवरण सार्वजनिक गर्दै देशका विभिन्न सडकखण्डमा यातायात पूर्ण रूपमा प्रभावित भएको जनाएको छ।

प्रहरीका अनुसार चितवनको पृथ्वीराजमार्ग शनिबार राति १०:२५ बजेदेखि अवरुद्ध छ। इच्छाकामना गाउँपालिका–५, सिमलधारास्थित सडक विस्तार भइरहेको स्थानमा रूखसहितको सुख्खा पहिरो खसेपछि सडक बन्द भएको हो।

त्यस्तै, रोल्पाको भालुवाङ–लिवाङ सडकखण्ड शनिबार राति ९:१५ बजेबाट अवरुद्ध भएको छ। सुनिलस्मृति गाउँपालिका–४, कागडाँडामा पहिरो खसेपछि सडकमा यातायात ठप्प भएको प्रहरीले जनाएको छ।

संखुवासभाको भोटखोला गाउँपालिका–३, सिरेकडाँडास्थित कोसी राजमार्गअन्तर्गत खाँदबारी–किमाथांका सडकखण्ड पनि वर्षाका कारण अवरुद्ध भएको छ। सडक करिब १० मिटर भासिएपछि उक्त खण्डमा यातायात सञ्चालन हुन सकेको छैन।

यसैगरी, शनिबार राति करिब १०:३० बजे मर्स्याङदी गाउँपालिका–४ मा पहिरो खसेपछि बेँसीसहर–मनाङ सडकखण्ड पूर्ण रूपमा अवरुद्ध भएको छ। बेनी–जोमसोम सडकखण्ड पनि राति ८:३० बजे थासाङ गाउँपालिका–४, कैकु खोलामा ढुंगासहितको लेदो पहिरो खसेपछि बन्द भएको प्रहरीले जनाएको छ।

बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा शनिबार साँझ ६ बजेदेखि आइतबार बिहान ४ बजेसम्म सवारीसाधन सञ्चालनमा रोक लगाइएको थियो। मकवानपुरको कान्ति लोकपथमा पनि रातिको समयमा सबै प्रकारका सवारीसाधनको आवतजावत बन्द गरिएको थियो। उक्त सडकमा साँझ ५ बजेदेखि बिहान ५ बजेसम्म यातायात रोकिएको प्रहरीले जनाएको छ।

इलामको राजदुवालीस्थित मेची राजमार्गमा वर्षाका कारण सडक हिलाम्मे भएपछि सवारीसाधन सञ्चालनमा समस्या भएको छ। उक्त सडकखण्ड पूर्ण रूपमा अवरुद्ध भए पनि वैकल्पिक मार्ग उपलब्ध रहेको प्रहरीले जनाएको छ।

सिन्धुपाल्चोकको अरनिको राजमार्गअन्तर्गत भोटेकोशी–२ कोदारी र लिपिङमा पहिरो खस्नुका साथै सडक भासिएपछि यातायात बन्द भएको छ। रसुवाको पासाङ ल्हामु सडकखण्ड र रुकुमपश्चिमको भेरी करिडोरसमेत अवरुद्ध रहेको प्रहरीले जनाएको छ।

बाढी र पहिरोका कारण प्रमुख राजमार्गहरू अवरुद्ध हुँदा विभिन्न स्थानमा सवारीसाधन रोकिएका छन्। सडक अवरुद्ध भएपछि यात्रुहरू बीच बाटोमै अलपत्र पर्नुका साथै गन्तव्यमा पुग्न समस्या भएको छ। विशेषगरी पृथ्वीराजमार्ग, कोसी राजमार्ग र अरनिको राजमार्गमा यातायात प्रभावित हुँदा ठूलो संख्यामा यात्रु प्रभावित भएका छन्।

प्रहरीले अवरुद्ध सडकखण्डहरू खुलाउन आवश्यक पहल भइरहेको जनाएको छ। यद्यपि, लगातारको वर्षाका कारण पहिरो हटाउने तथा सडक सुचारु गर्ने काममा कठिनाइ भइरहेको प्रहरीले जनाएको छ।

Originally published on abcnews.com.np.