काठमाडौं । राष्ट्रिय फोटो पत्रकार समूह (एनएफपीजे) नेपालको निमन्त्रणामा बंगलादेश फोटो पत्रकार संघका १२ जना फोटो पत्रकार नेपाल आइपुगेका छन्। संघका अध्यक्ष एकेएम मोहसिनको नेतृत्वमा आएको टोलीले भदौ ३ गते मनाइने विश्व फोटोग्राफी दिवसका अवसरमा नेपालमा आयोजना हुने विभिन्न कार्यक्रममा सहभागिता जनाउनेछ।

बंगलादेशी फोटो पत्रकार टोलीले विश्व फोटोग्राफी दिवसका अवसरमा काठमाडौंको हनुमानढोकामा ‘ब्युटिफुल बंगलादेश’ नामक फोटो प्रदर्शनी आयोजना गर्ने भएको छ। प्रदर्शनीमा बंगलादेशको प्राकृतिक सौन्दर्य, संस्कृति, जनजीवन तथा पर्यटनका विविध पक्षलाई नेपाली दर्शकमाझ प्रस्तुत गरिनेछ।

टोली आजै पोखरा र चितवनको तीनदिने भ्रमणमा जाने कार्यक्रम छ। भ्रमणका क्रममा नेपालको प्रमुख पर्यटकीय गन्तव्य पोखरा र चितवनको प्राकृतिक सौन्दर्य, सांस्कृतिक सम्पदा, पर्यटन गतिविधि तथा स्थानीय जीवनशैलीको अवलोकन गरी तस्बिरमार्फत बंगलादेशमा प्रचार–प्रसार गरिनेछ।

२१ वर्षदेखिको सम्बन्ध

राष्ट्रिय फोटो पत्रकार समूह नेपालका अध्यक्ष प्रदीपराज वन्तको निमन्त्रणामा बंगलादेशी फोटो पत्रकार टोली नेपाल आएको हो। अध्यक्ष वन्तका अनुसार बंगलादेश फोटो पत्रकार संघ र नेपालका फोटो पत्रकारबीच विगत २१ वर्षदेखि भाइचारा, सहकार्य र आपसी सम्बन्ध कायम रहँदै आएको छ।

यस्ता भ्रमण, तस्बिर आदानप्रदान तथा पर्यटन प्रवर्द्धनका गतिविधिले नेपाल र बंगलादेशबीचको सम्बन्ध थप मजबुत बनाउन योगदान पुग्ने अध्यक्ष वन्तले बताए।

“फोटो पत्रकारितामार्फत एकअर्का देशका पर्यटन, संस्कृति, प्राकृतिक सौन्दर्य र जनजीवनलाई विश्वमाझ चिनाउन सकिन्छ,” उनले भने।

नेपाल भ्रमणका क्रममा बंगलादेशी फोटो पत्रकारले पोखरा र चितवनका प्रमुख पर्यटकीय तथा सांस्कृतिक स्थलको अवलोकन गरी तस्बिर खिच्नेछन्। ती तस्बिर तथा सामग्री बंगलादेशका सञ्चारमाध्यम र फोटो पत्रकारिताका विभिन्न माध्यमबाट प्रचार–प्रसार गरिनेछ।

सहकार्य विस्तारको तयारी

एनएफपीजे नेपालले दुई देशका फोटो पत्रकारबीच कायम २१ वर्ष पुरानो सम्बन्धलाई थप सुदृढ गर्दै आगामी दिनमा पर्यटन, संस्कृति, पत्रकारिता तथा व्यावसायिक सहकार्यका क्षेत्रमा थप कार्यक्रम सञ्चालन गर्ने जनाएको छ।

फोटो पत्रकारबीचको नियमित भ्रमण र अनुभव आदानप्रदानले दुई देशको पर्यटन तथा सांस्कृतिक पहिचानलाई अन्तर्राष्ट्रिय स्तरमा प्रवर्द्धन गर्नसमेत सहयोग पुग्ने अपेक्षा गरिएको छ।

Originally published on abcnews.com.np.