काठमाडौं । ब्याकयार्ड अल्ट्रा–२०२६ मा अर्जुन कुलुङ राई र मन्जु सुनुवार च्याम्पियन बनेका छन्। अल्ट्रा ट्रेल्स नेपालले आयोजना गरेको प्रतियोगितामा एक्सटेपबाट सहभागी अर्जुन पुरुष तथा मन्जु महिलातर्फ विजेता बनेका हुन्।

अर्जुनले ३३ लुप पूरा गर्दै पुरुषतर्फ शीर्ष स्थान हासिल गरे। उनले यसक्रममा नयाँ कोर्स रेकर्डसमेत कायम गरेका छन्। यसअघि हेमन्त राणाको नाममा रहेको ३२ लुपको रेकर्ड अर्जुनले तोडेका हुन्।

महिलातर्फ मन्जुले १४ लुप पूरा गर्दै नयाँ कोर्स रेकर्ड बनाइन्। यसअघि महिलातर्फ १२ लुपको रेकर्ड थियो।

विजेता अर्जुन र मन्जुले समान ३० हजार रुपैयाँ पुरस्कार प्राप्त गरे।

प्रतियोगिताको नियमअनुसार प्रत्येक खेलाडीले एक लुपमा ६.७ किलोमिटर दूरी एक घण्टाभित्र पूरा गर्नुपर्ने थियो। निर्धारित समयमा लुप पूरा गर्न नसक्ने खेलाडी प्रतियोगिताबाट बाहिरिने व्यवस्था थियो।

आयोजकका अनुसार प्रतियोगितामा नेपालसहित फ्रान्स, अमेरिका, डेनमार्क, नर्वे र स्विट्जरल्यान्डलगायत विभिन्न देशका ६५ जना प्रतिस्पर्धी सहभागी थिए।

दौड चन्द्रागिरी नगरपालिकाको मत्छेगाउँबाट सुरु भएको थियो। विभिन्न क्षेत्रको परिक्रमा गरेपछि खेलाडीहरू पुनः मत्छेगाउँमै फर्किएर प्रतियोगिता सम्पन्न भएको थियो।

Originally published on abcnews.com.np.