काठमाडौं । नेपाल उद्योग वाणिज्य महासंघ (एफएनसीसीआई)का अध्यक्ष अञ्जन श्रेष्ठ र नेपालका लागि चिनियाँ राजदूत झाङ माओमिङबीच सोमबार काठमाडौंको टेकुस्थित महासंघ सचिवालयमा भेटवार्ता भएको छ। भेटवार्तामा नेपाल–चीनबीचको परम्परागत मैत्रीपूर्ण सम्बन्धलाई व्यापार, लगानी र दीर्घकालीन आर्थिक साझेदारीमा रूपान्तरण गर्नुपर्नेमा दुवै पक्षले जोड दिएका छन्।

भेटमा महासंघ, चिनियाँ दूतावास, चीनको व्यापार प्रवर्द्धनसम्बन्धी निकाय सीसीपीआईटी (CCPIT) तथा चिनियाँ प्रान्तीय वाणिज्य संघबीच नियमित संवाद र सहकार्यलाई थप प्रभावकारी बनाउने विषयमा छलफल भएको थियो।

व्यापार, लगानी, पर्यटन, प्रविधि हस्तान्तरण, संयुक्त उद्यम र नेपाली वस्तुको निर्यात प्रवर्द्धनमा केन्द्रित कार्यक्रम अघि बढाउने विषयलाई प्राथमिकतामा राखिएको महासंघले जनाएको छ।

‘प्रदर्शनीमा सहभागिता होइन, वास्तविक अर्डर चाहिन्छ’

महासंघ अध्यक्ष श्रेष्ठले नेपाल–चीनबीच लामो समयदेखि कायम रहेको सम्बन्धलाई अब ठोस आर्थिक लाभमा रूपान्तरण गर्नुपर्ने बताए।

उनले नेपाली उत्पादनलाई चिनियाँ बजारमा पुर्‍याउन पर्याप्त सम्भावना रहेको उल्लेख गर्दै चिया, कफी, जडीबुटी तथा हर्बल उत्पादन, हस्तकला, फेल्ट, हस्तनिर्मित कागज, तयारी पोसाक र सिङ्गिङ बाउल लगायतका वस्तुको निर्यात बढाउन सकिने बताए।

तर चीनबाट हुने आयातको तुलनामा नेपालबाट चीनतर्फ हुने निर्यात निकै न्यून रहेको उल्लेख गर्दै श्रेष्ठले व्यापार असन्तुलन घटाउन चिनियाँ पक्षको थप सहयोग आवश्यक रहेको बताए।

उनले नेपालले अन्तर्राष्ट्रिय व्यापार मेलामा सहभागिता जनाउने अभ्यासलाई अब व्यावसायिक परिणाममा रूपान्तरण गर्नुपर्ने बताए।

“अब प्रदर्शनीमा सहभागिता मात्र होइन, वास्तविक अर्डर, दीर्घकालीन खरिदकर्ता र व्यावसायिक साझेदारी निर्माण गर्नुपर्छ,” श्रेष्ठले भने।

महासंघले विगत १५ वर्षभन्दा बढी समयदेखि चीनको कुनमिङमा आयोजना हुँदै आएको चाइना–साउथ एसिया एक्स्पो लगायतका विभिन्न व्यापार मेलामा नेपाली व्यवसायीको सहभागिता गराउँदै आएको जानकारी पनि उनले दिए।

चिनियाँ पर्यटक र लगानी आकर्षित गर्न हवाई सम्पर्क विस्तारको माग

श्रेष्ठले चिनियाँ पर्यटकको संख्या बढाउन पोखरा र भैरहवा अन्तर्राष्ट्रिय विमानस्थलबाट चीनका विभिन्न गन्तव्यसम्म प्रत्यक्ष हवाई सम्पर्क विस्तार गर्नुपर्नेमा जोड दिए।

नेपाल अतिकम विकसित मुलुक (एलडीसी)को सूचीबाट स्तरोन्नतिको चरणमा प्रवेश गरिरहेको सन्दर्भमा निर्यात विविधीकरण, नेपाली उत्पादनको प्रतिस्पर्धात्मक क्षमता अभिवृद्धि तथा गुणस्तरीय वैदेशिक लगानी आकर्षित गर्न चीनले महत्वपूर्ण भूमिका खेल्न सक्ने उनको भनाइ छ।

चीनसँगको सहकार्यबाट नेपालमा उत्पादन क्षमता विस्तार गरी क्षेत्रीय तथा विश्वव्यापी मूल्य शृङ्खलामा जोडिन सकिने सम्भावना पनि श्रेष्ठले औँल्याए।

११औँ नेपाल अन्तर्राष्ट्रिय व्यापार मेलामा चिनियाँ सहभागिताको आग्रह

अध्यक्ष श्रेष्ठले आगामी डिसेम्बरमा काठमाडौंमा आयोजना हुने ११औँ नेपाल अन्तर्राष्ट्रिय व्यापार मेलामा चिनियाँ कम्पनीहरूको थप सहभागिताका लागि राजदूत माओमिङसँग आग्रह गरेका छन्।

उनले उक्त मेलालाई नेपाल र चीनका व्यवसायीबीच प्रत्यक्ष सम्पर्क, व्यापारिक साझेदारी र लगानीका अवसर पहिचान गर्ने महत्वपूर्ण मञ्चका रूपमा विकास गर्नुपर्ने बताए।

चिनियाँ राजदूत : ‘दीर्घकालीन आर्थिक साझेदारी आवश्यक’

भेटवार्तामा चिनियाँ राजदूत झाङ माओमिङले नेपाल–चीन सम्बन्धलाई आर्थिक तथा व्यावसायिक क्षेत्रमा थप गहिरो बनाउनुपर्ने बताए।

उनले नेपाली उत्पादनलाई चिनियाँ बजारमा प्रवर्द्धन गर्न तथा दुई देशका व्यवसायीबीच प्रत्यक्ष सम्पर्क विस्तार गर्न चिनियाँ दूतावासले सहजीकरण गर्ने प्रतिबद्धता जनाए।

राजदूत माओमिङले नेपाल–चीन सम्बन्धलाई परम्परागत व्यापारिक कारोबारमा सीमित नराखी लगानी, प्रविधि, संयुक्त उद्यम, निर्यात, पर्यटन तथा प्रत्यक्ष व्यावसायिक सहकार्यमा आधारित दीर्घकालीन आर्थिक साझेदारीमा रूपान्तरण गर्नुपर्ने बताए।

उनले यस्तो साझेदारी विस्तारका लागि चीन तयार रहेको समेत बताए।

‘गुणस्तर, ब्रान्डिङ र प्याकेजिङमा ध्यान दिनुस्’

चीन ठूलो र प्रतिस्पर्धात्मक बजार भएकाले नेपाली व्यवसायीले आफ्नो उत्पादनको गुणस्तर, ब्रान्डिङ, प्याकेजिङ र आपूर्ति क्षमतामा विशेष ध्यान दिनुपर्ने राजदूत माओमिङले बताए।

नेपाली व्यवसायीको क्षमता अभिवृद्धि र चिनियाँ बजारमा पहुँच विस्तारका लागि आवश्यक सहयोग गर्न चीन तयार रहेको उनको भनाइ थियो।

“नेपाल चीनको असल छिमेकी हो। नेपालको विकास र समृद्धिका लागि चीन सधैँ सकारात्मक छ। नेपाली वस्तुको निर्यातमा सहजीकरणका लागि पनि चीन तयार छ। यसका लागि नेपाली व्यवसायीहरूले आफ्नो क्षमता बढाउँदै लैजानुपर्दछ,” उनले भने।

व्यापार असन्तुलन घटाउन चिनियाँ बजारमा पहुँच आवश्यक

भेटमा महासंघका वरिष्ठ उपाध्यक्ष सुरकृष्ण वैद्य, उपाध्यक्षद्वय कृष्णप्रसाद शर्मा र नरेशलाल श्रेष्ठ, बागमती प्रदेश अध्यक्ष वेदबहादुर श्रेष्ठलगायतले चीन नेपालको दोस्रो ठूलो व्यापारिक साझेदार तथा महत्वपूर्ण वैदेशिक लगानी स्रोत रहेको उल्लेख गरे।

उनीहरूले दुई देशबीचको व्यापारमा रहेको असन्तुलन घटाउन नेपाली उत्पादनको चिनियाँ बजारमा पहुँच विस्तारका लागि थप सहजीकरण आवश्यक रहेको बताए।

नेपाल–चीन आर्थिक सम्बन्धलाई अब आयातमा केन्द्रित व्यापारिक सम्बन्धबाट उत्पादन, निर्यात, लगानी र प्रविधि हस्तान्तरणमा आधारित साझेदारीमा लैजानुपर्नेमा दुवै पक्षको जोड देखिएको छ। नेपालका लागि चुनौती भनेको चिनियाँ बजारमा प्रवेश गर्न सक्ने प्रतिस्पर्धी, गुणस्तरीय र पर्याप्त परिमाणका उत्पादन विकास गर्नु तथा त्यसका लागि आवश्यक लगानी र पूर्वाधार जुटाउनु हुनेछ।

Originally published on abcnews.com.np.