काठमाडौं । राष्ट्रिय स्वतन्त्र पार्टी (रास्वपा)का सांसद पारसमणि गेलालले सरकारका मन्त्रीहरूलाई देश घुम्नेभन्दा मन्त्रालयमै बसेर जनताका समस्या समाधान गर्ने नीति बनाउन सुझाव दिएका छन्।

प्रतिनिधिसभाको बैठकमा बोल्दै गेलालले सरकारको आलोचना गर्न नभई जनताले भोगिरहेका समस्या सरकारसमक्ष पुर्‍याउन आफूले आवाज उठाइरहेको बताए।

“मैले सरकारको विरोध गरेको सुनिएला। तर होइन। मैले जनताका आवाज सरकारलाई सुनाउन खोज्दै छु,” उनले भने।

मन्त्रीहरूलाई लक्षित गर्दै उनले प्रश्न गरे, “तपाईंहरू देश घुम्ने रहर हो कि समस्या समाधान गर्ने हुटहुटी?”

उनले मन्त्रीहरू बिदामा घुम्न गएजस्तो देश दौडिनुभन्दा मन्त्रालयमा बसेर नीति निर्माण र कार्यान्वयनमा ध्यान दिनुपर्ने बताए।

गेलालले देशका १६५ निर्वाचन क्षेत्रका समस्या र तिनको समाधानका उपायबारे सम्बन्धित क्षेत्रका सांसदहरूले सरकारलाई जानकारी दिन सक्ने बताए।

त्यसका लागि ठूलो संख्यामा सल्लाहकार नियुक्त गरेर राज्यको ढुकुटीमाथि अतिरिक्त भार पार्न आवश्यक नरहेको उनको भनाइ छ।

“देशका १६५ निर्वाचन क्षेत्रका समस्या र समाधानका उपायहरू समेत त्यस क्षेत्रका सांसदहरूले दिन सक्नुहुन्छ। त्यसका लागि जम्बो सल्लाहकार राखेर राज्यको ढुकुटी रित्याउन आवश्यक छैन,” उनले भने।

‘मन्त्रीलाई हेलिकोप्टर, जनतालाई अस्पताल पुग्ने साधन छैन’

सांसद गेलालले जनताले दैनिक रूपमा भोगिरहेका आधारभूत आवश्यकतासम्बन्धी समस्याप्रति सरकार गम्भीर हुनुपर्ने बताए।

उनका अनुसार नागरिक अहिले ग्यास, मल, सञ्चार, विद्युत्, सार्वजनिक सेवा तथा आधारभूत स्वास्थ्य सेवाका लागि संघर्ष गरिरहेका छन्।

सरकार र आम नागरिकबीच सेवा सुविधाको पहुँचमा रहेको असमानताप्रति कटाक्ष गर्दै उनले भने, “मन्त्रीलाई सामान्य रुघा लाग्दा हेलिकोप्टर उपलब्ध हुन्छ। तर जनता मर्न लाग्दा अस्पताल पुग्ने साधन हुँदैन, अस्पतालमा डाक्टर हुँदैनन्।”

उनले राज्यको स्रोत र सुविधा पहुँचवालाको सुविधामा मात्र केन्द्रित हुन नहुने बताए।

गेलालले मन्त्रीहरूका गतिविधि र प्रचार सामग्री सार्वजनिक हुँदैमा जनताले सरकारको कामको अनुभूति गर्न नसक्ने बताए।

उनका अनुसार सामाजिक सञ्जालमा मन्त्रीहरूका भिडियो र प्रचार देखाउनेभन्दा नागरिकको घरदैलोमा वास्तविक समस्या समाधान भएको अनुभूति पुग्न आवश्यक छ।

“जनताको घरघरमा मन्त्री पुगेको होइन, सरकारका कारण समस्या समाधान भएको अनुभूति पुग्नुपर्छ,” उनले भने।

उनले सरकारको कामको मूल्याङ्कन मन्त्रीहरू कति ठाउँ पुगे भन्ने आधारमा नभई नागरिकका समस्या कति समाधान भए भन्ने आधारमा हुनुपर्ने बताए।

‘देश नघुम्नुस्, समस्या समाधान गर्नुस्’

गेलालले सरकारका मन्त्रीहरूलाई स्पष्ट सन्देश दिँदै भने, “देश नघुम्नुस्, देशको समस्या समाधान गर्नुस्।”

उनले सरकारमा नयाँ अनुहार आए पनि काम गर्ने शैली पुरानै देखिन थालेको भन्दै जनतामा निराशा बढ्न थालेको बताए।

“अनुहार मात्रै फेरियो भनेर जनताले भन्न थालिसकेका छन्,” उनले भने।

सरकारले जनताको दैनिक जीवनसँग प्रत्यक्ष जोडिएका समस्या समाधानमा तत्काल परिणाम देखाउन नसके नयाँ राजनीतिक शक्तिप्रतिको जनविश्वाससमेत कमजोर हुन सक्ने उनको चेतावनी थियो।

Originally published on abcnews.com.np.