काठमाडौँ । नेपाली बजारमा आज सुनको मूल्य स्थिर रहेको छ भने चाँदीको मूल्यमा सामान्य गिरावट आएको छ।

नेपाल सुनचाँदी व्यवसायी महासंघका अनुसार सोमबार तोलामा १ हजार ६ सय रुपैयाँले बढेर ३ लाख ६ हजार ८ सय रुपैयाँ पुगेको सुनको मूल्य आज पनि सोही मूल्यमा कायम रहेको हो।

यसअघि गत शुक्रबार सुनको मूल्य तोलामा ४ हजार ६ सय रुपैयाँले घटेको थियो। त्यसपछि आइतबार र सोमबार गरी सुनको मूल्यमा कुल ५ हजार २ सय रुपैयाँको वृद्धि भएको थियो।

चाँदी २५ रुपैयाँले घट्यो

सुनको मूल्य स्थिर रहँदा चाँदीको भाउ भने आज तोलामा २५ रुपैयाँले घटेको छ। महासंघका अनुसार चाँदी आज प्रतितोला ४ हजार ७ सय ५५ रुपैयाँमा कारोबार भइरहेको छ।

सुनको उच्चतम मूल्य ३ लाख ३९ हजार

नेपाली बजारमा सुनको हालसम्मकै उच्च मूल्य गत माघ १५ गते कायम भएको थियो। उक्त दिन सुनको मूल्य एकै दिन तोलामा २० हजार ५ सय रुपैयाँले बढेर ३ लाख ३९ हजार ३ सय रुपैयाँ पुगेको थियो।

त्यस्तै, चाँदीको हालसम्मकै उच्च मूल्य पनि गत माघ १५ गते नै कायम भएको थियो। त्यस दिन चाँदीको मूल्य प्रतितोला ७ हजार ५०५ रुपैयाँ पुगेको थियो।

महासंघका अनुसार चाँदीको मूल्यमा हालसम्मकै ठूलो एकदिने गिरावट भने गत माघ १८ गते देखिएको थियो, जब यसको मूल्य तोलामा १ हजार ५ सय ६५ रुपैयाँले घटेको थियो।

Originally published on abcnews.com.np.