काठमाडौँ । श्रम संस्कृति पार्टीका अध्यक्ष एवं प्रतिनिधिसभा सदस्य हर्कराज राई (हर्क साम्पाङ) ले सरकार जनअपेक्षाअनुसार काम गर्न असफल भएको टिप्पणी गरेका छन्।

मंगलबार बसेको प्रतिनिधिसभा बैठकको विशेष समयमा बोल्दै सांसद राईले सरकारका विभिन्न मन्त्रालयको कार्यसम्पादन र जवाफदेहितामाथि प्रश्न उठाए। प्रधानमन्त्रीदेखि विभागीय मन्त्रीसम्मले आ–आफ्नो जिम्मेवारी प्रभावकारी रूपमा पूरा गर्न नसकेको उनको आरोप छ।

सीमा सुरक्षा, शान्ति सुरक्षा, मल तथा खाद्यान्न आपूर्ति, रोजगारी सिर्जना र महँगी नियन्त्रणजस्ता जनजीविकासँग प्रत्यक्ष जोडिएका विषयमा सरकार असफल भएको उनले बताए।

सांसद राईले प्रधानमन्त्री संसद्मा उपस्थित भएर जनतासँग सम्बन्धित प्रश्नको दफावार जवाफ दिनुपर्ने माग गरे।

‘सहकारी पीडितले पैसा फिर्ता पाएका छैनन्, न्यायालयमा न्याय छैन र अस्पतालमा उपचार पाउने अवस्था छैन। सरकार संसद्प्रति र संसद् जनताप्रति पूर्ण रूपमा जवाफदेही हुनुपर्छ, अन्यथा हाम्रो बहसको कुनै अर्थ रहँदैन,’ उनले भने।

विकास निर्माणका विषयमा बोल्दै राईले सुनसरी–१ सहित देशभरका विभिन्न विकास आयोजनाको ठेक्का प्रक्रिया तत्काल अघि बढाउन सरकारसँग माग गरे। उनले विकास निर्माणका कामलाई गति दिन सरकार गम्भीर हुनुपर्नेमा जोड दिए।

Originally published on abcnews.com.np.