काठमाडौँ । निर्वाचन आयोगले मृत्यु भएका मतदाताको विवरण मतदाता नामावलीबाट हटाउन सम्बन्धित परिवारका सदस्य तथा सरोकारवालालाई आग्रह गरेको छ।

आयोगका सहसचिव नारायणप्रसाद भट्टराईले प्रेस विज्ञप्ति जारी गर्दै मृतक मतदाताको विवरण अद्यावधिक गर्न सम्बन्धित निर्वाचन कार्यालयमा सूचना दिन आग्रह गर्नुभएको हो।

आयोगले मतदाता नामावलीलाई शुद्ध, अद्यावधिक, विश्वसनीय र वस्तुगत बनाउन नियमित रूपमा अद्यावधिक गर्दै आएको जनाएको छ। मतदाताको मृत्यु भएपछि एकाघर परिवारका सदस्य वा अन्य कुनै व्यक्तिले मृत्युदर्ता प्रमाणपत्रसहित सम्बन्धित निर्वाचन कार्यालयमा यथाशीघ्र जानकारी गराई मतदाता नामावली अद्यावधिक गर्न सक्ने व्यवस्था रहेको आयोगले जनाएको छ।

‘मतदाता नामावलीलाई अद्यावधिक गर्नु निर्वाचनको स्वच्छता, निष्पक्षता र विश्वसनीयताको आधार हो,’ आयोगको विज्ञप्तिमा उल्लेख छ।

गत फागुन २१ गतेको निर्वाचनपछि चैत २२ गतेदेखि मतदाता नामावली सङ्कलन तथा अद्यावधिकको काम सञ्चालन भइरहेको आयोगले जनाएको छ।

यस्तो छ नामावली अद्यावधिक प्रक्रिया

आयोगका अनुसार राष्ट्रिय परिचयपत्र भएका नेपाली नागरिकले सोही परिचयपत्रको विवरणका आधारमा अनलाइन प्रणालीमार्फत मतदाता नामावलीमा नाम दर्ता गर्न सक्नेछन्।

राष्ट्रिय परिचयपत्र प्रणालीमा आबद्ध नभएका नेपाली नागरिकले आयोगको ‘प्रि–इन्रोलमेन्ट’ प्रणालीमार्फत अनलाइन फारम भर्नुपर्नेछ। त्यसपछि फोटो तथा औँठाछापसहितको जैविक विवरण दिन सम्बन्धित प्रदेश वा जिल्ला निर्वाचन कार्यालयमा स्वयं उपस्थित हुनुपर्ने व्यवस्था छ।

त्यस्तै, मतदाता नामावलीमा नाम, थर वा ठेगाना सच्याउने, एउटै वडाभित्र रहेका दुई वा सोभन्दा बढी मतदानस्थलमध्ये आफूलाई पायक पर्ने स्थानमा नाम सार्ने, नागरिकताअनुसार विवरण सच्याउने तथा दोहोरो नाम हटाउनेलगायतका कार्यका लागि अनलाइन माध्यमबाट आवेदन दिन सकिने आयोगले जनाएको छ।

आयोगले मतदाता नामावलीलाई त्रुटिरहित र अद्यावधिक राख्न सम्बन्धित सबै पक्षलाई आवश्यक सहयोग गर्न आग्रह गरेको छ।

Originally published on abcnews.com.np.