काठमाडौँ । नेकपाका सांसद वर्षमान पुनले प्रधानमन्त्री बालेन्द्र (बालेन) शाहलाई आफ्ना मन्त्रीहरूलाई नियन्त्रणमा राख्न आग्रह गरेका छन्।

मंगलबार प्रतिनिधिसभाको बैठकमा बोल्दै पुनले विपद्को अवस्था गम्भीर रहेकाले गैरजिम्मेवार ढंगले राज्य सञ्चालन गर्न नसकिने बताए।

‘प्रधानमन्त्रीज्यूलाई ध्यानाकर्षण गराउँछु– आफ्ना मन्त्रीहरूलाई कन्ट्रोल गर्नुस्। विपद्को स्थिति के भइरहेको छ, त्यसबारे काम गर्नुस्,’ पुनले भने।

विपद् प्रभावित क्षेत्रमा राहत तथा उद्धारको आवश्यकता रहेका बेला मन्त्री भ्रमणमा गएको र हेलिकोप्टरमार्फत फर्काइएको विषयमा उनले प्रश्न उठाए। त्यसबारे जानकारी माग्दा सम्बन्धित पक्षबाट घरमा आराम गरिरहेको जवाफ आएको उनले बताए।

पुनले गृहमन्त्री सुधन गुरुङले जनताले आफ्ना गुनासा राख्दा ‘मत फिर्ता लैजानु’ भनेको आफूले सुनेको उल्लेख गरे। गृहमन्त्रीलाई आफूहरूले संसद्मा खोजिरहेको उनको टिप्पणी थियो।

मनसुनजन्य विपद्को सम्भावित जोखिम र त्यसको तयारीबारे गृहमन्त्रीले संसद्लाई जानकारी गराउनुपर्ने पुनको माग छ। विपद्पछिको उद्धार, राहत तथा पुनर्निर्माणका काम प्रभावकारी रूपमा अघि बढ्न नसकेको भन्दै उनले सरकारको ध्यानाकर्षण गराए।

Originally published on abcnews.com.np.