काठमाडौं । नेपाली कांग्रेसका सभापति गगन थापाले पार्टीको १५औँ महाधिवेशन प्रक्रिया मंगलबार (भदौ २) देखि औपचारिक रूपमा सुरु भएको बताएका छन्।

सानेपामा विभिन्न जिल्लामा निर्वाचनका लागि खटाइएका निर्वाचन अधिकृतहरूलाई प्रशिक्षण दिन आयोजित कार्यक्रममा बोल्दै सभापति थापाले असोज १६ गतेदेखि केन्द्रीय महाधिवेशन सुरु हुने दोहोर्‍याए।

थापाका अनुसार अब निर्वाचन समितिले तयार गर्ने कार्यतालिकाअनुसार अधिवेशनका विभिन्न चरण अघि बढाइनेछ। उनले अन्तिम मिति तलमाथि नहुने गरी कार्यतालिका बनाउन निर्वाचन समितिलाई भनिएको जानकारी दिए।

असन्तुष्ट पक्षसँग संवाद जारी

सभापति थापाले पार्टीभित्र असन्तुष्ट रहेका नेताहरूसँग आफू निरन्तर संवादमा रहेको बताए। कांग्रेसमा अहिले मुख्यतः क्रियाशील सदस्यता र निर्वाचन समितिसम्बन्धी विषयमा असन्तुष्टि रहेको उनको भनाइ छ।

उनले महामन्त्री प्रदीप पौडेल नेतृत्वको समितिले क्रियाशील सदस्यताको विषय टुंग्याइसकेको र सो सूची निर्वाचन समितिलाई हस्तान्तरण गरिने बताए। यही सूची महाधिवेशनको मतदाता सूचीका रूपमा प्रयोग हुने उनले स्पष्ट पारे।

सदस्यताको निष्पक्षतामाथि कसैलाई आशंका भए त्यसबारे छलफल गर्न आफू तयार रहेको पनि थापाले बताए। निर्वाचन समितिको कामकारबाहीबारे पनि कुनै प्रश्न वा आशंका भए खुला छलफल गर्न तयार रहेको उनको भनाइ छ।

डिजिटल सदस्यताले विवाद घटाउने दाबी

थापाले यसपटक कांग्रेसको क्रियाशील सदस्यता डिजिटल प्रणालीमा आधारित भएकाले आगामी अधिवेशनहरूमा सदस्यतासम्बन्धी विवाद कम हुने दाबी गरे।

उनका अनुसार विगतमा सदस्यता फाराम भर्ने तथा नवीकरण गर्ने प्रक्रियाबाट विवाद उत्पन्न हुने गरेको भए पनि अब डिजिटल प्रणालीका कारण प्रक्रिया सहज हुने अपेक्षा गरिएको छ।

समयको दबाब

महाधिवेशनका लागि पर्याप्त समय नरहेको भन्दै थापाले निर्धारित समयभित्रै सबै प्रक्रिया सम्पन्न गर्नुपर्ने बताए। संविधान, पार्टी विधान, विशेष महाधिवेशनको निर्णय तथा अदालतको आदेशसमेतका कारण कांग्रेस निर्धारित समयसीमाबाट पछि हट्न नसक्ने उनको भनाइ थियो।

असोज १६ गतेदेखि केन्द्रीय महाधिवेशन सुरु गर्ने निर्णयलाई आधार बनाएर निर्वाचनसम्बन्धी सम्पूर्ण प्रक्रिया अघि बढाइने उनले बताए।

विधान, निर्वाचन निर्देशिका तथा नियमका विषयमा अन्योल वा जटिलता नआओस् भन्ने उद्देश्यले निर्वाचन अधिकृतहरूलाई प्रशिक्षण कार्यक्रम आयोजना गरिएको थापाले स्पष्ट पारे।

Originally published on abcnews.com.np.