काभ्रे । काभ्रेपलाञ्चोकमा बर्डफ्लु संक्रमण फैलिएपछि ३० कृषकका ९० हजारभन्दा बढी पन्छी नष्ट गरिएको छ। जिल्ला पशुसेवा कार्यालय, धुलिखेलका अनुसार संक्रमण नियन्त्रणका लागि विभिन्न फर्ममा रहेका पन्छी नष्ट गरिएको हो।

कार्यालयका अनुसार बर्डफ्लुबाट प्रभावित कृषकलाई क्षतिपूर्ति उपलब्ध गराउने प्रक्रिया पनि अघि बढाइएको छ। हालसम्म २० जना कृषकले क्षतिको मूल्यांकनका आधारमा क्षतिपूर्ति प्राप्त गरिसकेका छन्। बाँकी १० कृषकलाई चालु आर्थिक वर्षमा क्षतिपूर्ति उपलब्ध गराइने कार्यालयका प्रमुख वरिष्ठ पशु चिकित्सक ब्रजकिशोर ठाकुरले जानकारी दिए।

९० हजारभन्दा बढी पन्छी नष्ट

कार्यालयका अनुसार जिल्लामा बर्डफ्लु संक्रमणका कारण ९० हजार २७५ पन्छी नष्ट गरिएको छ। नष्ट गरिएका पन्छीमा गिरिराज, लेयर्स, ब्रोइलर, राजहाँस, स्थानीय कुखुरा तथा पेकिङ हाँसलगायत छन्।

संक्रमण नियन्त्रणका क्रममा पन्छीबाहेक ३८ हजार १८३ वटा अण्डा, १० हजार २१० किलो दाना र ५ हजार २७५ क्रेट समेत नष्ट गरिएको कार्यालयले जनाएको छ।

बनेपा, पनौती र पाँचखालका फर्म प्रभावित

काभ्रेपलाञ्चोकका विभिन्न स्थानमा रहेका व्यावसायिक तथा स्थानीय कुखुरा फर्ममा बर्डफ्लु संक्रमण पुष्टि भएको थियो। विशेषगरी बनेपा, पनौती र पाँचखाल क्षेत्रका विभिन्न फर्ममा संक्रमण देखिएपछि सम्बन्धित क्षेत्रका पन्छी तथा अन्य जोखिमयुक्त सामग्री नष्ट गरिएको हो।

संक्रमणबाट कृषकले ठूलो आर्थिक क्षति व्यहोरेपछि सरकारले क्षतिपूर्ति उपलब्ध गराउने प्रक्रिया अघि बढाएको कार्यालयले जनाएको छ।

नाका तथा चेकपोस्टमा निगरानी कडा

बर्डफ्लु संक्रमण थप फैलिन नदिन जिल्लाका विभिन्न नाकामा पन्छी तथा पन्छीजन्य वस्तुको ओसारपसारमा निगरानी बढाइएको छ।

कार्यालयका अनुसार नाला, रोशी र खावा चेकपोस्टमा परीक्षणबिना तथा अवैध रूपमा कुखुरा ओसारपसार गर्ने कार्य नियन्त्रण गर्न निगरानी कडाइ गरिएको छ।

पन्छी तथा पन्छीजन्य उत्पादनको अनधिकृत ओसारपसारबाट संक्रमण अन्य क्षेत्रमा फैलिन सक्ने जोखिम रहेकाले चेकपोस्टमा परीक्षण र आवश्यक कागजातको जाँचलाई प्राथमिकता दिइएको कार्यालयले जनाएको छ।

Originally published on abcnews.com.np.