सुर्खेत । बराहताल गाउँपालिका–४ घुमाउनेस्थित भेरी नदीमा एक पुरुषको शव फेला परेको छ । स्थानीयवासीले बुधबार साँझ नदीमा शव देखेपछि प्रहरीलाई खबर गरेका थिए ।

सूचना पाएलगत्तै अस्थायी प्रहरी पोस्ट तरंगाबाट प्रहरी सहायक निरीक्षक कृष्णबहादुर बिष्टको कमान्डमा तीनजनाको टोली घटनास्थल पुगेको थियो । थप अनुसन्धानका लागि इलाका प्रहरी कार्यालय बाबियाचौरबाट प्रहरी निरीक्षक भूपेन्द्र शाहीको कमान्डमा सातजनाको टोलीसमेत परिचालन गरिएको जिल्ला प्रहरी कार्यालय सुर्खेतले जनाएको छ ।

प्रहरीका अनुसार घटनास्थल अस्थायी प्रहरी पोस्ट तरंगाबाट करिब तीन किलोमिटर पश्चिम तथा इलाका प्रहरी कार्यालय बाबियाचौरबाट करिब ४५ किलोमिटर पूर्व–दक्षिणमा पर्छ ।

हालसम्म शवको पहिचान हुन सकेको छैन । प्रहरीले घटनास्थलको निरीक्षणसहित मृतकको पहिचानका लागि आवश्यक अनुसन्धान अघि बढाएको जनाएको छ ।

शव परीक्षणका लागि बुधबार राति नै प्रदेश अस्पताल कालागाउँ, सुर्खेत पठाइएको छ । घटनाबारे थप अनुसन्धान भइरहेको प्रहरी निरीक्षक शाहीले जानकारी दिए ।

Originally published on abcnews.com.np.