प्रदेश प्रमुख दीपकप्रसाद देवकोटाले आज दिउँसो ४ः०५ बजे थापालाई मुख्यमन्त्रीमा नियुक्त गर्ने भएका हुन्। त्यसलगत्तै ४ः२० बजे शपथ समारोह आयोजना गरिने प्रदेश प्रमुखको कार्यालयले विज्ञप्तिमार्फत जनाएको छ।

मुख्यमन्त्री नियुक्तिका लागि एमाले, नेकपा र राष्ट्रिय प्रजातन्त्र पार्टी (राप्रपा) गरी तीन दलको समर्थनसहितको निवेदन प्राप्त भएको प्रदेश प्रमुखको कार्यालयले जनाएको छ। प्राप्त निवेदनका आधारमा नयाँ सरकार गठनको प्रक्रिया अघि बढाइने प्रदेश प्रमुख देवकोटाले स्पष्ट गरेका छन्।

यसैबीच, पार्टीको निर्णयविपरीत सरकार गठन प्रक्रियामा सहभागी भएको भन्दै राप्रपाले संसदीय दलका नेता उद्धव थापालगायतका नेतामाथि कारबाही गर्ने तयारी गरेको छ।

राप्रपाको निर्णयविपरीत एमाले नेतृत्वको सरकार गठनमा समर्थन गरेको विषयलाई लिएर पार्टीभित्र विवाद चर्किएको छ। पार्टी नेतृत्वले सरकार गठनमा संलग्न सांसद तथा नेताहरूलाई स्पष्टीकरणसहित कारबाहीको प्रक्रिया अघि बढाउने तयारी गरेको हो।