काठमाडौँ । नेकपा एमालेका किरण थापा मगर बागमती प्रदेशको मुख्यमन्त्री नियुक्त भएका छन्। प्रदेश प्रमुख दीपकप्रसाद देवकोटाले बिहीबार नेपालको संविधानको धारा १६८ को उपधारा (२) बमोजिम थापालाई मुख्यमन्त्री नियुक्त गरेका हुन्।

थापाले बुधबार नेकपा एमाले, नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा)का प्रदेशसभा सदस्यको समर्थनसहित मुख्यमन्त्रीमा दाबी पेस गरेका थिए। तीन दलको समर्थनमा बहुमत जुटेपछि प्रदेश प्रमुखले उनलाई मुख्यमन्त्री नियुक्त गरेका हुन्।

एमाले र नेकपाबीच बनेको नयाँ सत्ता समीकरणअनुसार बागमती प्रदेश सरकारको नेतृत्व एमालेको भागमा परेको थियो।

यसअघि एमालेले सरकारलाई दिएको समर्थन फिर्ता लिएपछि नेपाली कांग्रेसका मुख्यमन्त्री इन्द्रबहादुर बानियाँ अल्पमतमा परेका थिए। बानियाँले राजीनामा दिएपछि प्रदेश प्रमुख देवकोटाले संविधानको धारा १६८ को उपधारा (२) अनुसार नयाँ सरकार गठनका लागि दाबी पेस गर्न आह्वान गरेका थिए।

आजै शपथ

मुख्यमन्त्री नियुक्त भएका थापाले बिहीबार नै पद तथा गोपनीयताको शपथ लिने कार्यक्रम तय गरिएको छ। प्रदेश प्रमुखको कार्यालयका अनुसार शपथपछि थापाले पदभार ग्रहण गर्नेछन्।

थापाको नियुक्तिसँगै बागमती प्रदेशमा एमाले–नेकपा–राप्रपा गठबन्धनको नयाँ सरकार गठनको प्रक्रिया अघि बढेको छ।

Originally published on abcnews.com.np.