जनकपुरधाम । बाराको जीतपुरसिमरा उपमहानगरपालिका–१ की तीन वर्षीया गरिमा चौधरीको बलात्कारपछि हत्या भएको आशंकासँगै देशभर स्तब्धता फैलिएको छ। झन् चिन्ताजनक पक्ष के छ भने घटनामा मुख्य संलग्न रहेको आरोप १६ वर्षीय एक बालकमाथि लागेको छ।

प्रहरीले घटनामा संलग्न रहेको आरोपमा १६ वर्षीय सुमन थापा र २४ वर्षीय प्रोग्रेस चौधरीलाई पक्राउ गरी अनुसन्धान अघि बढाएको छ। प्रहरीको प्रारम्भिक अनुसन्धानले बालिकालाई फकाएर लगिएको, घटनापछि शव लुकाउने प्रयास गरिएको र अभियुक्त खोजी कार्यमा समेत सहभागी भएर शंकाबाट टाढा रहने प्रयास गरेको देखाएको छ।

गरिमा हराएको दुई दिनपछि घरबाट करिब दुई सय मिटर टाढा रहेको खाली घरमा कपडाले पोको पारिएको अवस्थामा उनको शव फेला परेको थियो। घटनाबारे प्रहरी अनुसन्धान जारी रहेकाले पक्राउ परेकामाथिका आरोप र उनीहरूको भूमिका अनुसन्धान तथा प्रमाणका आधारमा कानुनी रूपमा टुंगो लाग्नेछ।

Originally published on abcnews.com.np.