काठमाडौँ । काठमाडौँको शंखमुलस्थित भ्याली ब्वाइज होस्टलमा भएको कुटपिटमा २२ वर्षीय युवकको मृत्यु भएको छ। घटनामा संलग्न भएको आरोपमा प्रहरीले एक जनालाई पक्राउ गरेको छ भने अर्का एक जनाको खोजी भइरहेको जनाएको छ।

जिल्ला प्रहरी परिसर काठमाडौँका अनुसार होस्टलमा दाङको घोराही उपमहानगरपालिका–१७ का २२ वर्षीय वसन्त कालाथोकी, बाराको कलैया उपमहानगरपालिका–३ का १८ वर्षीय शेखर यादव र २० वर्षीय प्रमित पटेलबीच कुटपिट भएको थियो। कुटपिटका क्रममा धारिलो हतियारसमेत प्रयोग भएको प्रहरीले जनाएको छ।

घटनामा गम्भीर घाइते भएका कालाथोकीलाई तत्काल मिनभवनस्थित निजामती कर्मचारी अस्पताल लगिएको थियो। टाउको र घाँटीमा चोट लागेका उनी अस्पताल पुग्दा बोल्न सक्ने अवस्थामा थिएनन्। उपचारका क्रममा उनको मृत्यु भएको प्रहरीले जनाएको छ।

घटनापछि प्रहरीले शेखर यादवलाई नियन्त्रणमा लिएको छ। अर्का आरोपित प्रमित पटेल भने घटनालगत्तै फरार भएका छन्। उनको खोजी भइरहेको प्रहरीले जनाएको छ। घटनाबारे थप अनुसन्धान जारी रहेको प्रहरीले बताएको छ।

Originally published on abcnews.com.np.