काठमाडौं । नेपाल–भारत सीमा क्षेत्रका संवेदनशील स्थानमा सीसीटीभीसहित आधुनिक प्रविधिको प्रयोग गरी सुरक्षा निगरानी बढाइने भएको छ।

भारतको देहरादूनमा सम्पन्न नेपाल–भारत सीमा व्यवस्थापन संयुक्त कार्यदलको बैठकमा संवेदनशील सीमा क्षेत्रमा आधुनिक तथा नवीनतम उपकरण प्रयोग गरी सुरक्षा निगरानी सुदृढ गर्ने सहमति भएको हो।

गृह मन्त्रालयले शुक्रबार जारी गरेको विज्ञप्तिअनुसार सीमापार अपराध, लागुऔषध तथा मनोद्वीपक पदार्थको ओसारपसार, प्रतिबन्धित औषधि, वन्यजन्तु तथा मानव बेचबिखन, जाली नोटलगायत आर्थिक अपराध तथा हातहतियारको अवैध कारोबार नियन्त्रणका लागि दुवै देशका सम्बन्धित निकायबीच प्रभावकारी समन्वय गर्ने विषयमा पनि छलफल भएको छ।

बैठकमा नेपालको तर्फबाट गृह मन्त्रालयका सहसचिव आनन्द काफ्ले र भारतको तर्फबाट गृह मन्त्रालयकी सहसचिव पौसुमी बासुले प्रतिनिधिमण्डलको नेतृत्व गरेका थिए।

साइबर अपराध र डिजिटल ठगीको विषय उठ्यो

बैठकमा नेपालले सीमापार हुने साइबर अपराध तथा डिजिटल ठगीजस्ता उदीयमान सुरक्षा चुनौतीको विषय पनि उठाएको गृह मन्त्रालयले जनाएको छ।

दशगजा क्षेत्रमा हुने अतिक्रमण तथा अनधिकृत प्रयोग नियन्त्रण, एकीकृत जाँच चौकीको पूर्ण सञ्चालन, पारस्परिक कानुनी सहायता तथा सीमा व्यवस्थापनसँग सम्बन्धित अन्य विषयमा पनि छलफल भएको थियो।

सन् २०२५ मार्चमा पोखरामा सम्पन्न १३औँ बैठकका निर्णय कार्यान्वयनको अवस्थाबारे समेत समीक्षा गरिएको थियो।

सीमा आवागमन सहज बनाउने सहमति

बैठकमा नेपाल र भारतका नागरिकको सीमापार आवागमन सहज बनाउने विषयमा पनि छलफल भएको छ। दुवै देशका सीमा नाका हुँदै आवतजावत गर्ने तेस्रो मुलुकका नागरिकको सहजीकरण तथा निगरानी संयन्त्रलाई थप प्रभावकारी बनाउने विषयमा समेत सहमति भएको मन्त्रालयले जनाएको छ।

त्यसैगरी, विपद् व्यवस्थापन तथा नेपाल–भारत जिल्लास्तरीय समन्वय बैठकलाई प्रभावकारी बनाउने विषयमा पनि दुवै पक्षबीच सहमति भएको छ।

कार्यदलको आगामी बैठक दुवै पक्षको अनुकूल मितिमा नेपालमा आयोजना गर्ने सहमति भएको छ।

Originally published on abcnews.com.np.