पोखरा । प्रधानमन्त्री वालेन्द्र शाह (बालेन) शुक्रबार परिवारसहित मुस्ताङ जाने क्रममा कास्कीको माछापुच्छ्रे गाउँपालिका–६, अस्ताम पुगेका छन्। उनी अस्तामस्थित अन्नपूर्ण इको भिलेजमा बस्ने भएका छन्।

प्रधानमन्त्री शाह पोखराबाट स्थलमार्ग हुँदै पौने ३ बजे अस्ताम पुगेका हुन्। उनको भ्रमण निजी तथा पारिवारिक रहेको सरकारी अधिकारीहरूले बताएका छन्। भ्रमणबारे स्थानीय प्रशासनलाई समेत औपचारिक जानकारी थिएन।

कास्कीका प्रमुख जिल्ला अधिकारी शोभाखर अधिकारीले प्रधानमन्त्री आउनेबारे आफूहरूलाई पूर्वजानकारी नभएको बताए। “प्रधानमन्त्री आउनुहुन्छ भन्ने थाहा थिएन, आएपछि मात्रै जानकारी भयो,” उनले भने।

प्रधानमन्त्री शाह कालो सिसा भएको गाडीमा सुरक्षा घेराबीच इको भिलेजतर्फ लागेका थिए। स्थानीयवासीले उनलाई भेटेर आफ्ना समस्या राख्न खोजे पनि प्रत्यक्ष भेट्न नपाएको बताएका छन्। नेपाली सेनाले प्रधानमन्त्रीको सुरक्षा व्यवस्था मिलाएको छ।

खानेपानीको समस्या सुनाउने स्थानीयको चाहना

अस्तामका स्थानीयवासीले प्रधानमन्त्री शाहलाई भेटेर गाउँको खानेपानी समस्या सुनाउन चाहेका थिए। स्थानीय नन्दलाल अधिकारीका अनुसार गाउँमा खानेपानीको अभाव लामो समयदेखि रहेको छ।

“हामीले भेट्न पाएको भए खानेपानीको समस्याबारे कुरा राख्न मन थियो,” उनले भने।

रामप्रसाद अधिकारीले पनि गाउँमा खानेपानीको चरम अभाव रहेको बताए। उनका अनुसार हाल धम्पुसबाट पानी ल्याउने गरिएको भए पनि भौगोलिक उचाइका कारण माथिल्लो क्षेत्रमा पर्याप्त पानी पुग्न सकेको छैन।

स्थानीयवासीले यसअघि कुनै प्रधानमन्त्री अस्ताम नआएको भन्दै प्रधानमन्त्री शाहसँग भेटेर गाउँको समस्या राख्न पाएको भए राम्रो हुने बताएका छन्।

मुस्ताङ जाने तयारी

सुरक्षा स्रोतका अनुसार प्रधानमन्त्री शाह शनिबार बिहानै मुस्ताङतर्फ प्रस्थान गर्ने तयारीमा छन्। उनी शुक्रबार धादिङको ब्यारेकमा बिहानको खाना खाएर तनहुँको व्यास नगरपालिका–५, चापाघाटस्थित श्री कालिभञ्जन गणमा दिउँसो खाना खाएका थिए। त्यसपछि उनी पोखरा हुँदै अस्ताम पुगेका हुन्।

प्रधानमन्त्रीका लागि पोखरामै नेपाली सेनाले हेलिकप्टर तयारी अवस्थामा राखेको छ। यद्यपि, उनको मुस्ताङ भ्रमणको औपचारिक तालिका सार्वजनिक भएको छैन।

मुस्ताङकी प्रमुख जिल्ला अधिकारी अजिता शर्माले प्रधानमन्त्रीको भ्रमणबारे आफूहरूलाई औपचारिक तालिका प्राप्त नभएको बताइन्। “उहाँको भ्रमणबारे समाचारमा जे आएको छ, त्यही हो। तालिका अहिलेसम्म प्राप्त भएको छैन,” उनले भनिन्।

प्रधानमन्त्रीको सुरक्षामा काठमाडौंस्थित सुरक्षा संयन्त्रबाटै टोली परिचालन गरिएको बताइएको छ। स्थानीय प्रशासन तथा सुरक्षा निकायलाई उनको भ्रमणबारे पूर्वजानकारी नभएको अधिकारीहरूले बताएका छन्।

पर्यटकीय गाउँ अस्ताम

अस्ताम कास्कीको प्रमुख पर्यटकीय गन्तव्यका रूपमा परिचित छ। प्रधानमन्त्री शाहको निजी भ्रमणले गाउँको पर्यटन प्रवर्द्धनमा समेत सकारात्मक प्रभाव पर्ने स्थानीयको अपेक्षा छ।

तर, प्रधानमन्त्रीको आगमनका क्रममा आफ्ना समस्या प्रत्यक्ष सुनाउन नपाउँदा स्थानीयवासी भने केही निराश देखिएका छन्। उनीहरूले भ्रमणका क्रममा प्रधानमन्त्रीसमक्ष खानेपानीलगायत स्थानीय समस्याबारे ध्यानाकर्षण गराउने अवसर मिल्ने अपेक्षा गरेका थिए।

Originally published on abcnews.com.np.