काठमाडौं । ललितपुरको लुभुमा हायस अनियन्त्रित भई घरको गेटमा ठोक्किँदा चारजना घाइते भएका छन् । घाइतेमध्ये दुईजनाको अवस्था गम्भीर रहेको प्रहरीले जनाएको छ ।

महालक्ष्मी नगरपालिका–८, लुभुको नरकट्टेमा ‘अन टेस्ट’ नम्बर प्लेटको हायस अनियन्त्रित भएर दुर्घटनामा परेको हो । हायसले सुरुमा घरको गेटमा ठक्कर दिएको थियो । त्यसपछि पार्किङ गरी राखिएको बा १८ च ९२८८ नम्बरको कारमा समेत ठोक्किएको प्रहरीले जनाएको छ ।

दुर्घटनामा हायस चालक लुभुका २६ वर्षीय अखिल राजथला, महालक्ष्मी नगरपालिका–७ चागाथलीका २५ वर्षीय आशिष महर्जन, मकवानपुर घर भई महालक्ष्मी–६ सानागाउँ बस्दै आएकी १८ वर्षीया एलिसा लामा र लुभुका २६ वर्षीय राज महर्जन घाइते भएका छन् ।

प्रहरीका अनुसार अखिल राजथला र राज महर्जनको अवस्था गम्भीर छ । घाइते चारैजनाको ललितपुरस्थित बीएन्डबी र किस्ट अस्पतालमा उपचार भइरहेको छ ।

हायसमा चालकसहित चारजना मात्रै सवार रहेको प्रहरीले जनाएको छ । दुर्घटनामा पार्किङ गरी राखिएको कारमा सामान्य क्षति पुगेको छ ।

घटनाबारे प्रहरीले थप अनुसन्धान गरिरहेको जनाएको छ ।

Originally published on abcnews.com.np.