काठमाडौं । राष्ट्रिय स्वतन्त्र पार्टीका सभापति रवि लामिछानेले परिवर्तनको आन्दोलनलाई घात नगर्न आफूले किस्तीमा आएको प्रधानमन्त्री त्याग गरेको बताएका छन् । आइतबार आयोजित प्रशिक्षण कार्यक्रममा सम्बोधन गर्दै उनले यस्तो बताएका हुन् । “म यहाँ गर्वका साथ भन्न सक्छु, हाँसी हाँसी किस्तिमा आएको प्रधानमन्त्री पदलाई नमस्कार गरेको हो,” उनले भने, “२१ सिटको दलको रूपमा प्रधानमन्त्री बन्नका लागि मेरो हस्ताक्षर बाँकी राखेर प्रस्ताव आएको थियो । आन्दोनलाई घात नगर्न मैले हाँसी हाँसी अस्वीकार गरेँ,” उनले थपे ।

रास्वपा हाल अरूलाई दोष लगाएर उम्किने अवस्थामा नरहेको पनि उनले बताए । “हिजो हामीले दोष लगाउने कयौँ मानिसहरू थिए । कैयौँ नेताहरू थिए । दोषै दोषको चाङमा आफूलाई अग्लो बनाउन सक्थ्यौँ,” उनले भने, “आज कसलाई दोष लगाउने?”

नेता कार्यकर्तालाई उनले राम्रो काम गर्न नसके कम्तीमा गलत नगर्न आग्रह गरेका छन्।

रास्वपाको वर्तमान अवस्था

सभापति लामिछानेले आफ्नो पार्टी अहिले अरूलाई दोष लगाएर समस्याबाट उम्कने अवस्थामा नरहेको स्पष्ट पारेका छन् । विगतमा अन्य नेताहरू जस्तै दोषारोपण गरेर आफ्नो स्थिति बलियो बनाउन सकिने भए पनि, अहिले त्यस्तो अवस्था नभएको उनले बताए ।

Originally published on abcnews.com.np.