महोत्तरी । विवाह भएको दुई महिना नपुग्दै दाइजोको विषयमा विवाद चर्किएका बेला महोत्तरीमा एक नवविवाहिताको रहस्यमय मृत्यु भएको छ ।

भारतको सुरसण्ड निवासी २२ वर्षीया शिवानी राउतको पिपरा गाउँपालिका–५ स्थित ससुरालीमा मृत्यु भएको हो । मृतककी आमा रुवी देवीले छोरीलाई ससुराली पक्षले दाइजोमा मोटरसाइकल र थप सुन माग गर्दै शारीरिक तथा मानसिक यातना दिएको र त्यसैका कारण मृत्यु भएको आरोप लगाएकी छन् ।

रुवी देवी जलेश्वर नगरपालिका–८, रमौलस्थित मामाघरमा मुण्डन कार्यक्रममा सहभागी हुन आएकी थिइन् । त्यही क्रममा छोरीलाई भेट्न पिपरा पुगेकी उनले शिवानीले ससुराली पक्षबाट दाइजोका लागि दबाब र यातना खेपिरहेको थाहा पाएको बताइन् ।

‘ससुरालीले मोटरसाइकल र सुन नदिएसम्म मेरो छोरीलाई कतै जान दिन्नन् भनेका थिए,’ रुवीले भनिन् ।

रुवीका अनुसार उनले दिउँसो करिब २ बजे छोरीलाई भेटेकी थिइन् । तर, केही घण्टामै साँझ शिवानीको मृत्यु भएको खबर पाएपछि उनी स्तब्ध भएकी थिइन् ।

प्रादेशिक अस्पताल जनकपुरमा शव परीक्षणका क्रममा छोरीको घाँटीमा निलडाम देखिएको रुवीले बताइन् । त्यसपछि ससुराली पक्षले घाँटी थिचेर हत्या गरेको आशंका गर्दै उनले जिल्ला प्रहरी कार्यालय महोत्तरीमा जाहेरी दिएकी छन् ।

जाहेरीमा मृतकका पति सजन राउत, देवरद्वय प्रेम राउत र निराजन राउत तथा सासू नूतन देवीलाई विपक्षी बनाइएको छ ।

परिवारका अनुसार शिवानीको विवाह २०८३ साल असार १६ गते सजन राउतसँग भएको थियो । विवाहमा दाइजो दिइए पनि त्यसपछि ससुराली पक्षले थप सुन र मोटरसाइकल माग गर्दै आएको थियो ।

मृतककी मामा दिपुकुमार कापरका अनुसार भदौ ४ गते राति करिब ७ बजे शिवानीले श्रीमान्, सासू र देवरहरूले मोटरसाइकल ल्याउन दबाब दिँदै आफूलाई शारीरिक यातना दिएको बताएकी थिइन् । कापरले दाइजोकै कारण शिवानीको मृत्यु भएको दाबी गरेका छन् ।

यता, ससुराली पक्षले भने शिवानीले झुन्डिएर आत्महत्या गरेको बताउँदै आएको छ । तर, मृतकको घाँटीमा देखिएको निलडामलगायतका कारण परिवारले घटनाको प्रकृतिमाथि प्रश्न उठाएको छ ।

शवलाई थप परीक्षणका लागि धरानस्थित अस्पताल पठाइएको छ । प्रहरीले पति र सासूसहित तीन जनालाई अनुसन्धानका लागि पक्राउ गरेको जनाएको छ ।

जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक पञ्चलाल गोलेले जाहेरी प्राप्त भएको पुष्टि गर्दै घटनाबारे अनुसन्धान भइरहेको बताए ।

प्रहरीका अनुसार हालसम्म शिवानीको मृत्यु हत्या, आत्महत्या वा अन्य कारणबाट भएको भन्ने यकिन भइसकेको छैन । पोस्टमार्टम रिपोर्ट तथा अनुसन्धानबाट मृत्युको वास्तविक कारण खुल्ने अपेक्षा गरिएको छ ।

दाइजोका कारण शिवानीले निरन्तर शारीरिक र मानसिक यातना भोग्नुपरेको परिवारको आरोप छ । ससुराली पक्षले भने हत्या आरोप अस्वीकार गर्दै आएको छ । घटनाको वास्तविकता भने प्रहरी अनुसन्धान र पोस्टमार्टम रिपोर्टपछि मात्रै स्पष्ट हुनेछ ।

Originally published on abcnews.com.np.