काठमाडौं । नेपाली कांग्रेसका देउवा पक्षीय नेता दीपक खड्काले आफूले अदालत ‘सेटिङ’ गरेको भन्दै भइरहेको प्रचारप्रति आपत्ति जनाएका छन्।

सामाजिक सञ्जाल फेसबुकमा स्टाटस लेख्दै खड्काले न्याय खोज्ने क्रममा आफ्नो नाम जोडेर अदालत ‘सेटिङ’ गरेको आरोप लगाइनु स्वतन्त्र न्यायपालिकाप्रति अविश्वास पैदा गर्ने नियोजित प्रयास भएको बताएका छन्।

उनले सर्वोच्च अदालतमा उत्प्रेषण, प्रतिषेध र परमादेशको मागसहित अन्तरकालीन आदेश जारी गर्न निवेदन दर्ता गराएको स्पष्ट पारेका छन्। कांग्रेसको आन्तरिक जीवनमा भएका केही अन्यायपूर्ण घटनामा न्याय खोज्न आफू सर्वोच्च अदालत पुगेको उनको भनाइ छ।

‘अदालत सेटिङ’ गरेको भन्दै आफू समेतको नाम जोडेर गरिएको प्रचारप्रति गम्भीर ध्यानाकर्षण भएको जनाउँदै उनले यस्तो कुप्रचारप्रति खेद व्यक्त गरेका छन्।

खड्काले अदालतको गरिमा घटाउने योजनाबद्ध प्रयासप्रति सचेत रहन आग्रह गरेका छन्। आफू न्याय र स्वतन्त्रताको पक्षमा लड्ने ‘सिपाही’ भएको उल्लेख गर्दै उनले सबै अदालतप्रति समान विश्वास र भरोसा रहेको बताएका छन्।

कुसुम थापाको टिप्पणी

यसैबीच कांग्रेस केन्द्रीय सदस्य कुसुम थापाले पनि सामाजिक सञ्जालमार्फत खड्काको दाबीप्रति टिप्पणी गरेकी छन्।

उनले लेखेकी छन्, ‘तपाईंसँग धेरै पैसा छ भन्ने एक वर्षअघि जेन–जी आन्दोलनकै बेलाको भिडियोमा देख्यौँ हामीले पनि। तर, छ भन्दैमा अदालतका कर्मचारीदेखि श्रीमान्सम्म मिलाएको छु भन्दै नहिँड्नुहोला।’

अदालतमा दायर निवेदन र त्यससँग जोडिएको आरोप–प्रत्यारोपले कांग्रेसभित्रको आन्तरिक विवाद थप सार्वजनिक भएको छ।

Originally published on abcnews.com.np.