सिन्धुपाल्चोक । पहिरोका कारण ४० दिनदेखि अवरुद्ध चीनसँगको प्रमुख व्यापारिक नाका तातोपानी जोड्ने बाह्रबिसे–तातोपानी सडकअन्तर्गत इको खण्ड सोमबारदेखि सञ्चालनमा आएको छ।

भोटेकोसी गाउँपालिका–२ कोदारीस्थित इको क्षेत्रमा गत असार ३१ गते पहिरोसँगै सडक भासिएपछि सडक अवरुद्ध भएको थियो। सडक डिभिजन कार्यालयले नयाँ ट्र्याक खोलेपछि सोमबारदेखि उक्त खण्डमा सवारीसाधन सञ्चालनमा आएका हुन्।

सडक खुलाउन छ टिपर र १२ डोजर परिचालन गरिएको थियो। सडक डिभिजन कार्यालयका प्रमुख नारायणदत्त भण्डारीका अनुसार डाक्लाङमा सडक सञ्चालनमा आइसकेको छ भने इकोमा पनि सडक खोलिएको छ। लिपिङ खण्डमा समेत मर्मतसम्भारको काम शीघ्र सुरु गरिने उनले बताए।

इको खण्ड सञ्चालनमा आएपछि कोदारी बजारमा रोकिएका कन्टेनर भन्सारतर्फ जान थालेका छन्। सिन्धुपाल्चोक उद्योग वाणिज्य सङ्घका अध्यक्ष बुद्धराज बस्नेतका अनुसार लिपिङपारि अझै करिब ८५ कन्टेनर रोकिएका छन्।

भोटेकोसी गाउँपालिका–२ का वडाध्यक्ष कुमार श्रेष्ठका अनुसार बाह्रबिसे–तातोपानी सडकको २६ किलोमिटर खण्डमा वर्षायाममा पटक–पटक पहिरो जाने र सडक भासिने समस्या दोहोरिँदै आएको छ। इको खण्ड खुले पनि लिपिङको समस्या समाधान नभएसम्म तातोपानी नाका पूर्ण रूपमा सहज सञ्चालन हुन नसक्ने उनले बताए।

Originally published on abcnews.com.np.