जनकपुरधाम । आर्थिक मन्दीलगायतका कारणले मधेश प्रदेशमा आर्थिक वर्ष २०८२/८३ मा १ हजार ९३८ उद्योग व्यवसाय बन्द भएका छन्।

मधेश प्रदेश सरकारको उद्योग, वाणिज्य तथा पर्यटन मन्त्रालयका अनुसार उक्त अवधिमा उद्योगतर्फ ८२१ र वाणिज्यतर्फ १ हजार ११७ गरी १ हजार ९३८ उद्योग व्यवसायको लगत कट्टा गरिएको हो।

यद्यपि, सोही अवधिमा प्रदेशमा ५ हजार ६८ वटा नयाँ उद्योग दर्ता भएका छन्। मन्त्रालयका सूचना अधिकारी उपेन्द्रकुमार महतोका अनुसार पर्सामा १ हजार १०१, धनुषामा ७७७, सर्लाहीमा ६३६, सिरहामा ५५४, रौतहटमा ५३३, महोत्तरीमा ५१४, सप्तरीमा ३१४ र बारामा २३९ नयाँ उद्योग दर्ता भएका छन्।

गएको आवमा ७ हजार ५४० उद्योग नवीकरण गरिएको मन्त्रालयले जनाएको छ।

वाणिज्यतर्फ ६ हजारभन्दा बढी नयाँ फर्म

वाणिज्यतर्फ आर्थिक वर्ष २०८२/८३ मा ६ हजार १२२ वटा प्राइभेट फर्म र १८ वटा साझेदारी फर्म नयाँ दर्ता भएका छन्।

सोही अवधिमा ११ हजार १४४ वाणिज्य फर्म नवीकरण भएका छन्।

५ करोडभन्दा बढी राजस्व

नयाँ उद्योग तथा वाणिज्य फर्म दर्ता, नवीकरणलगायत विभिन्न शीर्षकबाट प्रदेश सरकारले ५ करोड २६ लाख ४९ हजार ५६२ रुपैयाँ राजस्व संकलन गरेको सूचना अधिकारी महतोले बताए।

किन बन्द भए उद्योग ?

मन्त्रालयका अनुसार विश्वव्यापी आर्थिक तरलताको कमी, बैंक तथा वित्तीय संस्थाबाट कर्जा लगानी कमजोर हुनु र पुँजीको अभाव उद्योग व्यवसाय बन्द हुनुका प्रमुख कारण हुन्।

त्यसैगरी स्थानीय तहमा उद्योग दर्ता गर्ने क्रम बढ्दै गएपछि प्रदेश सरकारको मातहतमा रहेका कतिपय उद्योगको लगत कट्टा हुने संख्या बढेको मन्त्रालयको भनाइ छ।

नयाँ उद्योग दर्ता उल्लेख्य भए पनि बन्द हुने उद्योगको संख्या पनि उच्च रहेकाले मधेश प्रदेशमा उद्योग व्यवसाय सञ्चालनका लागि लगानी वातावरण र वित्तीय पहुँच चुनौतीका रूपमा देखिएको छ।

Originally published on abcnews.com.np.