काठमाडौं । संघीय संसद्को अर्थसमितिले आगामी आर्थिक वर्षदेखि नेपाल राष्ट्र बैंकले हरेक वर्ष साउन १ गते नै मौद्रिक नीति सार्वजनिक गर्ने व्यवस्था प्रस्ताव गरेको छ।

समितिमा छलफल भइरहेको नेपाल राष्ट्र बैंक ऐन संशोधनसम्बन्धी विधेयकमा मौद्रिक नीति सार्वजनिक गर्ने मिति नै निश्चित गर्ने व्यवस्था समावेश गरिएको हो।

यसअघि राष्ट्र बैंकले सामान्यतया असारको अन्तिम साता वा साउनको पहिलो साताभित्र मौद्रिक नीति सार्वजनिक गर्दै आएको थियो। चालु आर्थिक वर्षको मौद्रिक नीति पनि असारको अन्तिम साता सार्वजनिक गरिएको थियो।

नयाँ प्रस्ताव कार्यान्वयनमा आए आगामी आर्थिक वर्षदेखि प्रत्येक वर्ष साउन १ गते मौद्रिक नीति सार्वजनिक गर्नुपर्नेछ। यसले मौद्रिक नीति सार्वजनिक गर्ने समयलाई निश्चित र नियमित बनाउन सहयोग पुग्ने समितिको अपेक्षा छ।

Originally published on abcnews.com.np.