काठमाडौं । स्वरोजगार लघुवित्त वित्तीय संस्था लिमिटेडले विन नेपाल लघुवित्त वित्तीय संस्था लिमिटेडलाई प्राप्ति गरी एकीकृत कारोबार सुरु गर्ने भएको छ।

नेपाल राष्ट्र बैंकबाट ‘घ’ वर्गको इजाजतपत्र प्राप्त स्वरोजगार लघुवित्तले आवश्यक कानुनी प्रक्रिया पूरा गरी नेपाल राष्ट्र बैंक, नेपाल धितोपत्र बोर्ड र कम्पनी रजिष्ट्रारको कार्यालयबाट अन्तिम स्वीकृति पाएपछि विन नेपाललाई प्राप्ति गर्ने प्रक्रिया अघि बढाएको हो।

प्राप्तिपछि विन नेपाल लघुवित्तका सम्पूर्ण सम्पत्ति, दायित्व तथा सम्भावित दायित्व स्वरोजगार लघुवित्तले व्यहोर्नेछ। दुवै संस्थाको एकीकृत वित्तीय कारोबार भदौ २१ गते आइतबारदेखि सुरु गर्ने तयारी गरिएको छ।

एकीकृत कारोबार सुरु हुने दिन दुवै संस्थाका सम्पूर्ण बैंकिङ सेवा एक दिनका लागि बन्द रहने जनाइएको छ। यसबारे सेवाग्राही, सेयरधनी तथा अन्य सरोकारवालालाई जानकारी गराइएको संस्थाले जनाएको छ।

संस्थाको नाम यथावत

प्राप्तिपछि पनि संस्थाको नाम ‘स्वरोजगार लघुवित्त वित्तीय संस्था लिमिटेड’ नै रहनेछ। संस्थाको केन्द्रीय कार्यालय काभ्रेपलाञ्चोकको बनेपा नगरपालिका–५ मा रहने जनाइएको छ।

लघुवित्त क्षेत्रमा एकीकरण बढ्दै

लघुवित्त क्षेत्रमा पछिल्लो समय मर्जर तथा प्राप्तिको क्रम बढेको छ। नियामकीय आवश्यकता, सञ्चालन लागत व्यवस्थापन तथा तुलनात्मक रूपमा सबल संस्था निर्माण गर्ने उद्देश्यले लघुवित्त संस्थाहरूबीच एकीकरण भइरहेको छ।

स्वरोजगार लघुवित्त र विन नेपालको प्राप्तिले पनि लघुवित्त क्षेत्रमा भइरहेको संस्थागत एकीकरणको क्रमलाई थप निरन्तरता दिएको छ।

Originally published on abcnews.com.np.