जनकपुरधाम । मधेश प्रदेश सरकारले नेपाल प्रहरीलाई १२ वटा चारचक्के सवारी साधन उपलब्ध गराएको छ। प्रदेश सरकारको गृह, सञ्चार तथा कानुन मन्त्रालयले महिन्द्रा कम्पनीका बोलेरो डबल क्याबिन पिकअप जिप खरिद गरी नेपाल प्रहरीलाई हस्तान्तरण गरेको हो।

सोमबार मधेश प्रदेश सरकारका गृह, सञ्चार तथा कानुनमन्त्री फकिरा महतोले प्रहरीका सम्बन्धित कार्यालयलाई सवारी साधन हस्तान्तरण गरेका हुन्।

मन्त्री महतोका अनुसार मधेश प्रदेशको शान्तिसुरक्षा चुस्त–दुरुस्त बनाउन तथा प्रहरीको परिचालन क्षमता बढाउने उद्देश्यले आठ जिल्ला प्रहरी कार्यालय र चार इलाका प्रहरी कार्यालयलाई गाडी उपलब्ध गराइएको हो।

चन्द्रपुर, गरुडा, गोडैता र गडहिया इलाका प्रहरी कार्यालयले समेत नयाँ सवारी साधन प्राप्त गरेका छन्।

अपराध नियन्त्रणमा सहयोग पुग्ने अपेक्षा

प्रदेश सरकारले प्रहरीको परिचालन क्षमता वृद्धि, शान्तिसुरक्षा कायम र अपराध नियन्त्रणलाई प्रभावकारी बनाउन सवारी साधन खरिद गरेको जनाएको छ।

गृह, सञ्चार तथा कानुन मन्त्रालयका अनुसार सवारी साधन खरिद गर्दा प्रचलित कानुनी प्रक्रिया पूरा गरिएको थियो। नयाँ सवारी साधनबाट प्रहरीको नियमित गस्ती, आकस्मिक परिचालन तथा सुरक्षा व्यवस्थापनमा थप सहजता हुने अपेक्षा गरिएको छ।

Originally published on abcnews.com.np.