काठमाडौं । सीजी एमएडब्लू इभोलुसन प्रालिले नाडा अटो शो २०२६ को पहिलो दिन प्रिमियम विद्युतीय एसयूभी अवतार ०७ नेपाली बजारमा औपचारिक रूपमा सार्वजनिक गरेको छ।

अवतार ०७ को एमएडब्लू ग्रुपका अध्यक्ष विष्णुकुमार अग्रवाल, चौधरी ग्रुपका प्रबन्ध निर्देशक निर्वाण चौधरी, चांगान इन्टरनेसनल कर्पोरेसनका प्रतिनिधि दु काइजियान (केभिन) र एमएडब्लू वृद्धिका प्रबन्ध निर्देशक विवेक सिकारियाले संयुक्त रूपमा अनावरण गरेका हुन्।

‘स्मार्ट एलिगेन्स, एफर्टलेस लक्जरी’ अवधारणामा तयार गरिएको अवतार ०७ मा आधुनिक डिजाइन, इन्टेलिजेन्ट प्रविधि, आरामदायी क्याबिन तथा विद्युतीय कार्यक्षमता समेटिएको कम्पनीले जनाएको छ।

५७५ किलोमिटर रेन्ज

अवतार ०७ मा ८२.१६ किलोवाट आवर क्षमताको एलएफपी ब्याट्री जडान गरिएको छ। कम्पनीका अनुसार एनईडीसी परीक्षण मापदण्डअनुसार पूर्ण चार्जमा यसले अधिकतम ५७५ किलोमिटरसम्म रेन्ज दिन्छ।

रियर ह्विल ड्राइभ पावरट्रेन रहेको गाडीले १९० किलोवाट अधिकतम पावर र ३६५ एनएम टर्क उत्पादन गर्छ। यसले शून्यदेखि १०० किलोमिटर प्रतिघण्टाको गति ७.७ सेकेन्डमा लिन सक्ने कम्पनीले जनाएको छ।

विलासी क्याबिन

अवतार ०७ को क्याबिनमा ३५.४ इन्चको फोर–के पानोरामिक डिस्प्ले र १५.६ इन्चको सेन्ट्रल टचस्क्रिन राखिएको छ।

यस्तै, नाप्पा लेदर अपहोल्स्ट्री, ६४ रङको एम्बियन्ट लाइटिङ तथा १६ स्पिकरसहितको पायोनियर अडियो सिस्टम उपलब्ध छ।

गाडीमा जिरो–ग्राभिटी फ्रन्ट सिट, सिट भेन्टिलेसन तथा हिटिङ, मसाज सुविधा, वायरलेस एप्पल कारप्ले र एन्ड्रोइड अटो तथा ५० वाटको वायरलेस स्मार्टफोन चार्जरलगायत सुविधा छन्।

सुरक्षामा इन्टेलिजेन्ट प्रविधि

अवतार ०७ मा नौवटा एयरब्यागसहित विभिन्न इन्टेलिजेन्ट ड्राइभर असिस्टेन्स तथा सुरक्षा प्रणाली राखिएको छ।

कम्पनीका अनुसार यी प्रणालीलाई लाइडार, हाई–डेफिनिसन क्यामेरा तथा अल्ट्रासोनिक राडारले सहयोग गर्छन्।

२ करोड २० लाखदेखि मूल्य

नेपालमा अवतार ०७ को अधिकतम खुद्रा मूल्य २ करोड २० लाख रुपैयाँ तोकिएको छ। एफएचडी प्रणालीसहितको अवतार ०७ को मूल्य २ करोड ३० लाख रुपैयाँ निर्धारण गरिएको छ।

नाडा अटो शो २०२६ अवधिभर अवतारको पेभिलियनमा अवतार ०७ प्रत्यक्ष अवलोकन तथा अनुभव गर्न सकिने कम्पनीले जनाएको छ।

Originally published on abcnews.com.np.