काठमाडौं । रसुवाको भोटेकोशी नदीमा आएको बाढीमा बेपत्ता भएका आफन्तको शव नभेटिएपछि परिवारहरूले कुशको प्रतिमा बनाएर अन्त्येष्टि गर्न थालेका छन्। बुधबार पशुपति आर्यघाटमा पनि बेपत्ताका आफन्तहरूले परम्पराअनुसार कुशको प्रतिमा बनाएर दाहसंस्कार गरेका हुन्।

पशुपति क्षेत्र विकास कोषअन्तर्गत आर्यघाटमा दाउरा व्यवस्थापनमा खटिएका कर्मचारी बुद्ध तामाङका अनुसार बुधबार बिहानैदेखि बेपत्ताका आफन्तहरू कुशको प्रतिमा बनाएर अन्त्येष्टिका लागि आर्यघाट पुगेका थिए। बाढीमा बेपत्ता भएका व्यक्तिको शव नभेटिएपछि परिवारले धार्मिक तथा सांस्कृतिक परम्पराअनुसार कुशको प्रतिमा बनाएर अन्तिम संस्कार गर्न थालेका हुन्।

“बेपत्ताका आफन्तहरूले आज बिहानैदेखि परम्पराअनुसार कुशको प्रतिमा बनाएर अन्त्येष्टि गर्न आउनुभएको छ,” तामाङले भन्नुभयो, “एकजना व्यक्तिदेखि समूहकै पनि दाहसंस्कार हुनसक्ने भएकाले कति जनाको भयो भनेर यकिन संख्या भन्न सम्भव छैन।”

बेपत्ताका आफन्तहरू बिहानैदेखि आर्यघाटमा भेला भएका कारण त्यहाँ भीडसमेत बढेको उहाँले बताउनुभयो। कतिपय परिवारले बेपत्ताको तस्वीर राखेर श्रद्धाञ्जलीसमेत व्यक्त गरेका छन्। पशुपतिस्थित किरियापुत्री घरसमेत भरिएको जनाइएको छ।

भोटेकोशी बाढीमा परी निधन भएकाहरूको पशुपति क्षेत्रस्थित आर्यघाट र भष्मेश्वर घाटमा निःशुल्क दाहसंस्कारको व्यवस्था यसअघि नै गरिएको छ। पशुपति क्षेत्र विकास कोषले विपद्मा ज्यान गुमाएकाहरूको दाहसंस्कारका लागि आवश्यक व्यवस्था मिलाएको जनाएको छ।

बेपत्ताको शव लामो समयसम्म नभेटिएपछि कुशको प्रतिमा बनाएर अन्तिम संस्कार गर्ने क्रम प्रभावित परिवारमा देखिन थालेको छ। यसअघि पर्वतका भोटेकोशी बाढीमा बेपत्ता शिवप्रसाद लम्सालको समेत शव नभेटिएपछि कुशको आकृति बनाएर अन्तिम संस्कार गरिएको थियो।

Originally published on abcnews.com.np.