काठमाडौं । नेकपा एमालेका अध्यक्ष केपी शर्मा ओलीलाई नेतृत्वबाट हटाउने संकेतसहित तयार पारिएको निर्वाचन समीक्षा तथा पार्टी पुनर्गठनसम्बन्धी प्रतिवेदन पुनर्लेखन गर्न निर्देशन दिइएको छ।

एमाले उपाध्यक्ष रामबहादुर थापा ‘बादल’ नेतृत्वको निर्वाचन समीक्षा तथा पार्टी पुनर्गठन कार्यदलले सातै प्रदेशका नेता तथा कार्यकर्तासँग छलफल गरी प्रतिवेदन तयार पारेको थियो। कार्यदलका सदस्य सचिव एवं एमाले महासचिव शंकर पोखरेलले ६५ पृष्ठको प्रतिवेदन तयार गरेका हुन्।

प्रतिवेदनमा पार्टीको संगठनात्मक संरचनासँगै नेतृत्वसमेत पुनर्गठन गर्नुपर्ने सुझाव दिइएको छ। प्रतिवेदनको बुँदा नम्बर १७ मा ‘पार्टी पुनर्गठनमा नेतृत्वको भूमिका र जिम्मेवारी’ शीर्षकअन्तर्गत नेतृत्व परिवर्तनका विषयसमेत समेटिएको छ।

प्रतिवेदनमा पार्टी पुनर्गठनका लागि नेतृत्व वा कार्यकर्ताको अग्रसरताबाट प्रक्रिया अघि बढाउन सकिने उल्लेख छ। कार्यकर्ताको अग्रसरतामा विशेष महाधिवेशन बोलाउन सकिने व्यवस्थालाई पनि प्रतिवेदनमा जोड दिइएको छ।

एमाले विधानअनुसार महाधिवेशन प्रतिनिधि परिषद्का बहुमत सदस्य वा दुई तिहाइ जिल्ला कमिटीले माग गरेमा विशेष महाधिवेशन आह्वान गर्न सकिने व्यवस्था छ।

प्रतिवेदनमा विशेष महाधिवेशन सामान्यतया नेतृत्वको चाहनाअनुसार नहुने वैधानिक प्रक्रिया भएको उल्लेख गर्दै पार्टी पुनर्गठनका लागि अध्यक्ष स्वयंले अग्रसरता लिनुपर्ने सुझाव दिइएको छ।

‘पार्टी नेतृत्वले नै पार्टी पंक्तिको चाहना र भावनाको प्रतिनिधित्व गरेर पार्टी शुद्धीकरण, सुदृढीकरण र रुपान्तरणसहितको पार्टी पुनर्गठनको अगुवाइ गर्नुपर्दछ,’ प्रतिवेदनमा उल्लेख गरिएको छ।

ओलीको असन्तुष्टि, प्रतिवेदन पुनर्लेखन हुँदै

कार्यदलले औपचारिक रूपमा प्रतिवेदन बुझाउनुअघि नै यसको सामग्री अध्यक्ष ओलीसम्म पुगेको थियो। प्रतिवेदनमा नेतृत्व पुनर्गठनको विषय समेटिएकोप्रति ओलीले असन्तुष्टि जनाउँदै महासचिव पोखरेललाई प्रतिवेदन पुनर्लेखन गर्न निर्देशन दिएको बताइएको छ।

अहिले कार्यदल प्रतिवेदन संशोधन तथा पुनर्लेखनमा जुटेको जनाइएको छ।

७० वर्षे उमेर हद र दुई कार्यकालको सीमा

कार्यदलले एमालेमा यसअघि रहेको ७० वर्षे उमेर हद तथा नेतृत्वमा दुई कार्यकालको सीमा पुनः लागू गर्न सुझाव दिएको छ। यी विषयमा थप छलफल आवश्यक रहेको प्रतिवेदनमा उल्लेख गरिएको बताइएको छ।

गुण्डुमा भदौ ४ गते भएको छलफलमा एमालेका केही नेताले नेतृत्व परिवर्तनको विषय उठाएका थिए। उक्त छलफलपछि कार्यदलले निर्वाचन समीक्षा र पार्टी पुनर्गठनसम्बन्धी प्रतिवेदन तयार गरेको बताइएको छ।

प्रतिवेदनको अन्तिम स्वरूप भने अध्यक्ष ओलीको निर्देशनपछि पुनर्लेखनबाट तय हुने भएको छ।

Originally published on abcnews.com.np.