काठमाडौँ । इस्लाम धर्मावलम्बीका अन्तिम पैगम्बर हजरत मोहम्मद सलल्लाहो (रसुल) को १५०१औँ जन्मजयन्ती आज बुधबार नेपालसहित विश्वभरका मुस्लिम समुदायले विभिन्न धार्मिक तथा सामाजिक कार्यक्रम आयोजना गरी मनाउँदै छन्।

पैगम्बर मोहम्मदलाई मुस्लिम समुदायले इस्लाम धर्मका सन्देशवाहक तथा मार्गदर्शकका रूपमा सम्मान गर्ने गर्दछ। उहाँको जन्म साउदी अरबको मक्का शहरमा भएको थियो भने उहाँको जीवन र इस्लाम धर्मको प्रचार–प्रसारसँग मक्का र मदिना विशेष रूपमा जोडिएका छन्।

पैगम्बर मोहम्मदको जन्म भएको ५३ वर्षपछि इस्लामिक पात्रो अर्थात् हिजरी संवत्को प्रारम्भ भएको मानिन्छ। हाल हिजरी संवत् १४४८ चलिरहेको छ।

मुस्लिम धार्मिक विश्वासअनुसार पैगम्बर मोहम्मदलाई प्राप्त दिव्य सन्देशहरू पछि पवित्र ग्रन्थ कुरानका रूपमा स्थापित भएका हुन्। उहाँले मानवता, शान्ति, न्याय, समानता, करुणा र नैतिक जीवनका विषयमा दिएका शिक्षालाई इस्लाम धर्मावलम्बीहरूले विशेष महत्वका साथ स्मरण गर्ने गर्छन्।

मक्का–मदिना इस्लामका प्रमुख पवित्र स्थल

साउदी अरबमा रहेका मक्का र मदिना इस्लाम धर्मका सबैभन्दा महत्वपूर्ण धार्मिक स्थल मानिन्छन्। मक्का पैगम्बर मोहम्मदको जन्मस्थल हो भने मदिना उहाँको जीवन र इस्लाम धर्मको विस्तारसँग जोडिएको ऐतिहासिक शहर हो।

मुस्लिम धर्मावलम्बीहरूका लागि मक्कास्थित काबा अत्यन्त पवित्र धार्मिक स्थल मानिन्छ। इस्लाम धर्मका अनुयायीहरूले जीवनमा कम्तीमा एकपटक मक्का पुगेर हज गर्ने इच्छा राख्ने गर्छन्।

आज मोहम्मद जयन्तीका अवसरमा पैगम्बर मोहम्मदको जीवन, उहाँका उपदेश तथा इस्लाम धर्ममा पुर्‍याएको योगदानलाई स्मरण गर्दै विशेष कार्यक्रम आयोजना गरिँदै छन्।

नेपालमा पनि विशेष कार्यक्रम

नेपालका विभिन्न स्थानमा रहेका मस्जिद तथा मुस्लिम समुदायका धार्मिक संस्थाले आज र्याली, सभा, धार्मिक प्रवचन तथा विशेष प्रार्थनासहितका कार्यक्रम आयोजना गरेका छन्।

काठमाडौँस्थित नेपाली जामे मस्जिद, काश्मीरी जामे मस्जिदलगायत विभिन्न मस्जिदमा विशेष धार्मिक कार्यक्रम आयोजना गरिएको छ। मुस्लिम समुदायका अगुवा तथा धर्मगुरुहरूले पैगम्बर मोहम्मदले दिएको शान्ति, सद्भाव, मानवता र भाइचाराको सन्देशलाई व्यवहारमा लागू गर्नुपर्नेमा जोड दिने अपेक्षा गरिएको छ।

मोहम्मद जयन्तीका अवसरमा सरकारले नेपाली मुस्लिम धर्मावलम्बीका लागि आज सार्वजनिक बिदासमेत दिएको छ।

यस अवसरमा देशभरका मुस्लिम समुदायले पैगम्बर मोहम्मदप्रति श्रद्धा व्यक्त गर्दै उहाँले प्रतिपादन गरेका मानवता, न्याय, सहिष्णुता र सामाजिक सद्भावका सन्देशलाई स्मरण गरिरहेका छन्।

Originally published on abcnews.com.np.