पोखरा । गण्डकी प्रदेश सरकारबाट नेकपा एमाले औपचारिक रूपमा बाहिरिएको छ । एमालेका चार मन्त्रीले बुधबार मुख्यमन्त्री सुरेन्द्रराज पाण्डेसमक्ष सामूहिक राजीनामा बुझाएसँगै २०८१ साउनदेखि कायम कांग्रेस–एमाले सत्ता गठबन्धन औपचारिक रूपमा अन्त्य भएको हो ।

भौतिक पूर्वाधार विकास तथा यातायात व्यवस्थामन्त्री गोविन्दबहादुर नेपाली, कृषि, भूमि व्यवस्था तथा सहकारीमन्त्री भीमबहादुर कार्की, उद्योग तथा पर्यटनमन्त्री यशोदा रिमाल र स्वास्थ्यमन्त्री लक्ष्मणबहादुर पाण्डेले मुख्यमन्त्रीसमक्ष संयुक्त रूपमा राजीनामा बुझाएका छन् ।

एमालेले मंगलबार नै सरकारबाट बाहिरिने निर्णय गरेको थियो । बुधबार बसेको एमाले संसदीय दलको बैठकले उक्त निर्णय अनुमोदन गरेपछि मन्त्रीहरूले राजीनामा बुझाएका हुन् ।

नयाँ राजनीतिक समीकरणको सम्भावना

एमाले सरकारबाट बाहिरिएसँगै गण्डकी प्रदेशमा नयाँ राजनीतिक समीकरण बन्ने सम्भावना देखिएको छ ।

मुख्यमन्त्री सुरेन्द्रराज पाण्डे नेतृत्वको सरकारले अब कांग्रेससहित अन्य दलसँग सहकार्य गरेर सरकार सञ्चालनलाई निरन्तरता दिने तयारी गर्न सक्ने देखिन्छ ।

एमालेले सरकारबाट बाहिरिए पनि प्रदेशसभामा आफ्नो भूमिका कायमै राख्ने जनाएको छ । सरकारमा सहभागिता अन्त्य भएपछि प्रदेश सरकारको नीति तथा कार्यक्रम निर्माण र निर्णय प्रक्रियामा भने एमालेको भूमिका प्रतिपक्षीका रूपमा रहनेछ ।

Originally published on abcnews.com.np.