काठमाडौं । रसुवामा बुधबार आएको बाढीमा परी घाइते भएका सात जनालाई हेलिकप्टरमार्फत काठमाडौं ल्याएर उपचार सुरु गरिएको छ। उनीहरूमध्ये चार जनाको त्रिवि शिक्षण अस्पताल र तीन जनाको राष्ट्रिय ट्रमा सेन्टरमा उपचार भइरहेको छ।

त्रिवि शिक्षण अस्पतालका प्रवक्ता डा. गोपाल सेढाईका अनुसार बाढीमा घाइते भएका चार जनालाई अस्पतालमा ल्याइएको हो। उनीहरूको उपचार सुरु भइसकेको र केहीको अवस्था गम्भीर रहेको उनले बताए।

घाइतेको उपचारका लागि अस्पतालले ‘डिजास्टर कोड’ सक्रिय गरेको छ। आईसीयू, भेन्टिलेटर र आवश्यक शय्या तयारी अवस्थामा राखिएको डा. सेढाईले जानकारी दिए।

“उपचारका लागि हामी तयारी अवस्थामा बसेका छौँ। अस्पतालको डिजास्टर कोड सक्रिय छ। आईसीयू, भेन्टिलेटरसहित शय्या तयारी अवस्थामा राखेका छौँ,” उनले भने। घाइतेलाई थप ल्याउन सकिने अवस्थालाई ध्यानमा राख्दै अस्पतालको हेलिप्याडसमेत तयारी अवस्थामा राखिएको उनले बताए।

यस्तै, बाढीमा घाइते भएका तीन जनालाई राष्ट्रिय ट्रमा सेन्टरमा ल्याइएको छ। ट्रमा सेन्टरका मेडिकल सुपरिटेन्डेन्ट डा. रुद्र मरासिनीका अनुसार घाइतेमध्ये दुई पुरुष र एक महिला छन्। उनीहरू तीनै जना नुवाकोटका बासिन्दा हुन्।

तीनै जनाको पेट, हात र कम्मरमा चोट लागेको छ। उनीहरूलाई ट्रमा सेन्टरको आकस्मिक कक्षमा राखेर उपचार भइरहेको छ।

Originally published on abcnews.com.np.