काठमाडौं । नुवाकोट जिल्लाका राप्रपा अध्यक्ष कुलबहादुर खड्गीको घर बाढीले बगाएको छ । उनी जसोजसो परिवारसहित भागेर ज्यान जोगाउन सफल भए ।

नुवाकोटको विदुर नगरपालिका १ नम्बर वडा, पुरानो पुलको ठ्याक्कै अगाडि खड्गीको घर थियो बिहान करिब ९ बजे पसेको बाढीले उनको घरसँगै बस्ती नै सोत्तर बनाइदियो । नेपाल प्रेससँगको फोन सम्पर्कमा खड्गीले अहिले आफ्नो परिवारसहित बस्तीका मानिस बजारभन्दा २ सय मिटरमाथिको डाँडामा उक्लिएर उद्धारको पर्खाइमा रहेको बताए । खड्गीका अनुसार त्यहाँ अहिले ४० जना जति स्थानीय छन् ।

बाढीको सूचना ढिला आउँदा सतर्कता अपनाउन नपाएको उनले बताए ।

‘पहिले पहिले ४-५ घन्टा अगाडि सुचना आउँथ्यो । आज त आधा घन्टा अगाडि मात्रै आयो । एकजना स्थानीय पत्रकारले साढे ८ बजे फोन गर्र भन्नुभयो । हतार हतार गाडी मगाएर भाग्यौँ । लगाएको कपडा र अलिकति नगदबाहेक घरबाट सामान केही निकाल्न पाइएन,’ खड्गीले सुनाए ।

पुलमा बाढी आइपुग्नु एकैसाथ भएको उनले बताए । खड्गीको चार तल्ले पक्की घर थियो । त्यो क्षणभरमै बाढिले बगाएपछी उनी घरवारविहीन बनेका छन् । अब कहाँ जाने, के खाने कुनै ठेगान नभएको उनी बताउँछन् ।

‘यहाँ हिँड्ने बाटोसमेत छैन । हाम्रो घरहरूभन्दा १०० मिटर माथिसम्म पानीको लेदो आएको थियो’ उनले भने । अझै पानी फुटेर आउने हल्लाका कारण उनी थप चिन्ता र त्रासमा छन् ।

Originally published on abcnews.com.np.