काठमाडौं । सरकारले रसुवाको भोटेकोशी नदीमा आएको विनाशकारी बाढीपछि दैनिक उपभोग्य वस्तु तथा सेवाको आपूर्ति सहज बनाउन उद्योगी तथा व्यवसायीलाई आग्रह गरेको छ।

वाणिज्य, आपूर्ति तथा उपभोक्ता संरक्षण विभागले विपद्बाट प्रभावित क्षेत्रमा आवश्यक वस्तुको आपूर्ति नियमित राख्न सम्पूर्ण उद्योगी, व्यवसायी तथा आम उपभोक्तालाई सहयोग गर्न अनुरोध गरेको हो।

विभागले खाद्यान्न तथा औषधोपचारका सामग्रीलाई पहिलो प्राथमिकतामा राखेर सहज उपलब्ध गराउन आग्रह गरेको छ। यस्तै, जोखिमयुक्त स्थानमा रहेका पसल तथा गोदाम सुरक्षित स्थानमा सार्न र स्थानीय प्रशासनसँग समन्वय गरी अत्यावश्यक वस्तुको वितरण व्यवस्थित गर्न व्यवसायीलाई आग्रह गरिएको छ।

विपद्को कठिन परिस्थितिको फाइदा उठाउँदै कालोबजारी, कृत्रिम अभाव तथा अनुचित मूल्यवृद्धि हुन सक्ने भन्दै विभागले त्यस्ता गतिविधिमाथि निरन्तर निगरानी भइरहेको जनाएको छ।

गुनासो भए तत्काल जानकारी दिन आग्रह

विभागले बजारमा अनुचित व्यापारिक गतिविधि भएको वा उपभोक्ता अधिकार हनन हुने काम भएको पाइए तत्काल जानकारी गराउन आग्रह गरेको छ।

उपभोक्ताले विभागको वेबसाइटमा रहेको गुनासो पोर्टल, क्यूआर कोड, टोल–फ्रि हटलाइन ११३६, इमेल वा सम्बन्धित जिल्ला प्रशासन कार्यालयमा सिधै उजुरी दर्ता गर्न सक्ने व्यवस्था गरिएको विभागले जनाएको छ।

कानुनविपरीत गतिविधिमा कडा कारबाही

विभागले विपद्को समयमा कालोबजारी, कृत्रिम अभाव सिर्जना गर्ने वा अनुचित मूल्यवृद्धि गर्ने जस्ता कानुनविपरीत गतिविधि गरेको पाइए कानुनबमोजिम कडा कारबाही गरिने चेतावनी दिएको छ।

विपद् व्यवस्थापनमा सहयोग गर्न, अत्यावश्यक वस्तुको आपूर्ति सहज बनाउन र बजार स्वच्छता कायम राख्न विभागले उद्योगी, व्यवसायी तथा सम्बन्धित सबै पक्षलाई अपिल गरेको छ।

Originally published on abcnews.com.np.