गोरखा । गोरखाको पालुङटार नगरपालिका–५ र ४, ठाँटीपोखरीबाट गोसाइँकुण्ड तीर्थयात्राका लागि छुटेको बस सम्पर्कविहीन भएपछि बसमा सवार यात्रुको विवरण सार्वजनिक भएको छ।

बुधबार बिहान ५ बजे ठाँटीपोखरीबाट रसुवाको गोसाइँकुण्डतर्फ गएको ग १ ख ११५२ नम्बरको बसमा चालक र सहचालकसहित ३६ जना सवार रहेको जिल्ला प्रहरी कार्यालय गोरखाका प्रहरी नायब उपरीक्षक राजकुमार श्रेष्ठले बताउनुभयो।

उहाँका अनुसार हालसम्म रविन्द्र देवकोटा, तुलाराम देवकोटा, बद्रीप्रसाद देवकोटा, बाबुराम देवकोटा, पार्वती न्यौपाने र सहचालक नीरज भण्डारी गरी ६ जना सुरक्षित सम्पर्कमा आउनुभएको छ।

बसमा सवार अन्य ३० जना भने अझै सम्पर्कविहीन हुनुहुन्छ। उहाँहरूको अवस्थाबारे गोरखा प्रहरीले रसुवा, नुवाकोटलगायत जिल्लाका प्रहरी तथा सम्बन्धित निकायसँग समन्वय गरी खोजी गरिरहेको जनाएको छ।

सम्पर्कविहीन हुनेमा कमला पण्डित, कृष्णलाल देवकोटा, केदार पण्डित, घनश्याम देवकोटा, उहाँकी श्रीमती, तारा रानाभाट, तुलराम देवकोटाकी श्रीमती, दिलबहादुर खत्री, पदमकुमारी देवकोटा, बाबुराम देवकोटाकी श्रीमती, राहरी देवकोटा, माया देवी देवकोटा, माया देवी खड्का, मिठुमाया अम्गाई, मधुमाया पण्डित र मुरारी खत्री हुनुहुन्छ।

त्यस्तै राममाया देवकोटा, रामहरि देवकोटाकी श्रीमती, रविन्द्र देवकोटाकी आमा, सागर देवकोटा, सरिता अधिकारी पण्डित, सम्झना देवकोटा, सुजाता कौडेल, सुमी कुमाल, सुष्मा न्यौपाने पोखरेल, सुष्मिता कुँवर, शारदा देवकोटा, मुक्ति अम्गाई, दुर्गा देवकोटा र गोमा पपने पनि सम्पर्कविहीन रहेको प्रहरीले जनाएको छ।

बससँग सम्पर्क टुटेपछि यात्रुका आफन्तले तत्काल खोजी तथा उद्धारको पहल गर्न सम्बन्धित निकायसँग आग्रह गरेका छन्। पालुङटार नगरपालिका प्रमुख विवश चिन्तनका अनुसार यात्रुमध्ये केहीसँग मोबाइल सम्पर्क भए पनि सबैसँग सम्पर्क हुन सकेको छैन।

प्रहरी नायब उपरीक्षक श्रेष्ठले सम्पर्कमा आएका यात्रुबाट बसको अवस्था र उनीहरू कहाँसम्म पुगेका थिए भन्नेबारे थप जानकारी लिने प्रयास भइरहेको बताउनुभयो।

बस कहाँ पुगेको थियो, अहिले बसको अवस्था के छ र यात्रुहरू सम्पर्कविहीन हुनुको वास्तविक कारण के हो भन्नेबारे अहिलेसम्म स्पष्ट जानकारी प्राप्त हुन सकेको छैन। प्रहरीले सम्बन्धित जिल्लाका सुरक्षा निकायसँग समन्वय गरी खोजी तथा उद्धारको काम अघि बढाइरहेको जनाएको छ।

Originally published on abcnews.com.np.