सिन्धुपाल्चोक । भोटेकोसी नदीमा आएको बाढीबाट प्रभावित नुवाकोटको बट्टार र त्रिशूली बजार क्षेत्रमा आजदेखि विद्युत् सेवा सुचारु भएको छ। नेपाल विद्युत् प्राधिकरणले वैकल्पिक व्यवस्था गरी ती क्षेत्रमा विद्युत् आपूर्ति सञ्चालनमा ल्याएको हो।

प्राधिकरणका अनुसार बालाजु–त्रिशूली र चपली–देवीघाट ६६ केभी प्रसारण लाइनलाई ११ केभीमा चार्ज गरी विद्युत् आपूर्ति गरिएको हो। बाढीका कारण नियमित विद्युत् आपूर्ति प्रणालीमा क्षति पुगेपछि उपलब्ध संरचनाको वैकल्पिक प्रयोग गरी प्रभावित क्षेत्रमा सेवा पुनःस्थापना गरिएको प्राधिकरणले जनाएको छ।

विद्युत् सेवा सुचारु भएसँगै बट्टार, त्रिशूली बजार र आसपासका क्षेत्रमा आपूर्ति भइरहेको छ। बाढीबाट क्षतिग्रस्त विद्युत् संरचनाको मर्मत तथा पुनःस्थापनाको काम पनि तीव्र पारिएको प्राधिकरणले जनाएको छ।

प्राधिकरणका अनुसार प्रभावित अन्य क्षेत्रमा समेत विद्युत् सेवा नियमित बनाउन आवश्यक काम भइरहेको छ। बाढीबाट क्षति पुगेपछि वैकल्पिक व्यवस्थामार्फत सेवा पुनःस्थापनाका लागि प्राधिकरणका कर्मचारीहरू निरन्तर खटिएका थिए।

Originally published on abcnews.com.np.