तिब्बतको सीमावर्ती क्षेत्र केरुङ, चीन । बाढीका कारण ज्यान गुमाउनेहरूको संख्या बढिरहेका बेला चिनियाँ प्रधानमन्त्री ली छियाङ आज बिहीबार केरुङ आइपुग्नुभएको छ। सरकारी समाचार एजेन्सी सिन्ह्वाका अनुसार राष्ट्रपति सी चिनफिङले प्रधानमन्त्री लीलाई वरिष्ठ अधिकारीहरूको टोलीसहित केरुङ पठाउनुभएको हो।

प्रधानमन्त्री लीसहितको टोलीले बाढी प्रभावित क्षेत्रमा जारी उद्धार तथा राहत कार्यको निरीक्षण गर्नुका साथै स्थानीयवासीसँग भेटघाट गरी अवस्थाबारे जानकारी लिनुहुनेछ। राष्ट्रपति सीले बुधबार नै सम्बन्धित निकायलाई तत्काल उद्धार तथा राहत कार्य अघि बढाउन निर्देशन दिनुभएको थियो।

प्रधानमन्त्री लीले पनि चिनियाँ विदेश मन्त्रालयमार्फत नेपाल सरकारसँग समन्वय गरी उद्धार तथा खोजी कार्यलाई प्रभावकारी बनाउन निर्देशन दिनुभएको छ।

५५८ जना अझै बेपत्ता

चिनियाँ पक्षका अनुसार हालसम्म बाढी प्रभावित क्षेत्रमा तीन जनाको शव फेला परेको छ भने ५५८ जना अझै बेपत्ता छन्। चिनियाँ विदेश मन्त्रालयका अनुसार नेपालतर्फ पनि करिब १०० चिनियाँ नागरिक बेपत्ता भएका छन्।

दुवै देशले बेपत्ता नागरिकको खोजी तथा उद्धार कार्यलाई तीव्रता दिन आवश्यक समन्वय र संवाद गरिरहेका छन्।

१४१ सदस्यीय उद्धार टोली परिचालन

प्रधानमन्त्री लीसँगै बिहीबार मध्याह्न १४१ सदस्यीय उद्धार टोली पनि केरुङ पुगेको छ। चिनियाँ जनमुक्ति सेनाको विमानमार्फत तिब्बत ल्याइएको उक्त टोलीले ड्रोनसहित अत्याधुनिक उपकरण प्रयोग गरेर खोजी तथा उद्धार कार्य सञ्चालन गर्नेछ।

नेपालसँग समन्वयमा जोड

बाढीबाट केरुङ क्षेत्रमा ठूलो क्षति पुगेपछि चीन सरकारले नेपालतर्फ बेपत्ता भएका आफ्ना नागरिकको खोजी तथा उद्धारमा समेत सहयोग गर्ने प्रतिबद्धता जनाएको छ। प्रधानमन्त्री लीको केरुङ भ्रमणपछि उद्धार, खोजी तथा राहत कार्य थप तीव्र हुने अपेक्षा गरिएको छ।

Originally published on abcnews.com.np.