काठमाडौं । संयुक्त राष्ट्रसंघका मानवीय सहायता प्रमुख टोम फ्लेचरले नेपालमा आएको विनाशकारी बाढीपछि आपत्कालीन उद्धार टोली परिचालन गरिएको बताउनुभएको छ। उहाँका अनुसार थप उद्धार टोलीलाई समेत तयारी अवस्थामा राखिएको छ।

अन्तर्राष्ट्रिय राहत प्रयासको समन्वय गरिरहेको संयुक्त राष्ट्रसंघले विश्व स्वास्थ्य संगठन (डब्ल्यूएचओ) का कर्मचारीहरू १० हजार मानिसलाई तीन महिनासम्म पुग्ने औषधि, टेन्ट तथा आवश्यक आपूर्ति सामग्रीसहित प्रभावित क्षेत्रमा पुगिसकेको जनाएको छ।

आपत्कालीन चिकित्सा सेवा, आश्रय तथा खानेपानी व्यवस्थापनका लागि संयुक्त राष्ट्रसंघको केन्द्रीय आपत्कालीन कार्य कोषबाट तत्काल २० लाख अमेरिकी डलर छुट्ट्याइएको फ्लेचरले सामाजिक सञ्जाल एक्समार्फत जानकारी दिनुभएको छ।

राष्ट्रिय तथा अन्तर्राष्ट्रिय संस्थाको सहभागिता

सेभ द चिल्ड्रेनले नुवाकोटमा आफ्ना कर्मचारी परिचालन गर्न सुरु गरेको छ। नेपाल रेडक्रसले पनि प्रभावित क्षेत्रमा २०० वटा आपत्कालीन आश्रय प्याकेज पठाइएको जनाएको छ।

विभिन्न देश तथा अन्तर्राष्ट्रिय संस्थाले विपद् प्रभावितका लागि सहयोगको प्रतिबद्धता जनाएका छन्। अमेरिकी विदेशमन्त्री मार्को रुबियो र क्यानडाका प्रधानमन्त्री मार्क कार्नीले बाढीबाट भएको जनधनको क्षतिप्रति दुःख व्यक्त गर्दै नेपाल सरकारलाई सहयोग गर्ने प्रतिबद्धता जनाउनुभएको छ।

भारत र युरोपेली संघ (ईयू)ले समेत राहत तथा उद्धार कार्यमा सहयोग गर्ने घोषणा गरेका छन्।

उद्धार टोली परिचालन

नेपाल प्रहरी, सशस्त्र प्रहरी बल नेपाल तथा नेपाली सेनाका टोली बाढी आएदेखि नै उद्धार कार्यमा खटिएका छन्। प्रतिकूल मौसम तथा सडक अवरुद्ध भएका कारण चिनियाँ उद्धार टोली भने मुख्य प्रभावित क्षेत्र केरुङ नाकामा बिहीबार मात्र पुग्न सकेका हुन्।

केरुङ नाकासहित बाढीबाट अतिप्रभावित क्षेत्रमा राहत सामग्री वितरण तथा उद्धार कार्यलाई प्रभावकारी बनाउन विभिन्न टोली परिचालन गरिएको छ।

Originally published on abcnews.com.np.