प्राधिकरणका अनुसार भू–उपग्रह तस्बिर तथा प्रारम्भिक विश्लेषणबाट भदौ १० गते बाढी आएको स्थानमा नदी थुनिएर ताल बनेको पुष्टि भएको छ। उक्त ताल विस्तार हुँदै गएको र फुट्ने सम्भावना बढेको जानकारी चीनले नेपाललाई पठाएको प्राधिकरणले जनाएको छ।

सम्भावित जोखिमलाई मध्यनजर गर्दै भोटेकोशी नदीको तल्लो तटीय क्षेत्रका बासिन्दा, यात्रु, उद्धार कार्यमा खटिएका उद्धारकर्ता तथा सम्बन्धित सबैलाई विशेष सतर्कता अपनाउन आग्रह गरिएको छ।

अर्को सूचना जारी नभएसम्म नदी किनार तथा अन्य जोखिमयुक्त क्षेत्रमा नबस्न र सुरक्षित स्थानमा रहन प्राधिकरणले अनुरोध गरेको छ।

उद्धार टोलीलाई तयारी अवस्थामा रहन आग्रह

राष्ट्रिय विपद् जोखिम न्यूनीकरण तथा व्यवस्थापन प्राधिकरणले चीनबाट प्राप्त सूचनाका आधारमा तत्काल विज्ञप्ति जारी गर्दै सम्भावित बाढीको जोखिमबारे सचेत गराएको हो।

प्राधिकरणले नदी आसपासका बासिन्दालाई सम्भावित जोखिमबाट जोगिन सुरक्षित स्थानमा सर्न आग्रह गरेको छ। साथै, सम्भावित आपत्कालीन अवस्थालाई मध्यनजर गर्दै उद्धार तथा राहतमा खटिने टोलीलाई समेत तयारी अवस्थामा रहन आग्रह गरिएको छ।