काठमाडौं । संयुक्त अधिराज्य बेलायतका राजा चार्ल्स तृतीयले नेपाल–चीन सीमा क्षेत्रमा आएको विनाशकारी बाढीबाट भएको ठूलो जनधनको क्षतिप्रति गहिरो दुःख व्यक्त गरेका छन्।

राजा चार्ल्सले शुक्रबार जारी गरेको सन्देशमा बेलायतका धेरै मानिसहरूको नेपाल तथा प्रभावित हिमाली क्षेत्रसँग बलियो, गहिरो र व्यक्तिगत सम्बन्ध रहेको उल्लेख गर्दै विपद्मा आफ्ना प्रियजन गुमाएकाहरू तथा परिवारजनको अवस्थाबारे चिन्तित रहेकाहरूप्रति गहिरो समवेदना व्यक्त गरेका छन्।

उनले बाढी तथा विपद्को समयमा अरूको जीवन बचाउने क्रममा ज्यान गुमाएका सुरक्षाकर्मीका परिवारप्रति पनि हार्दिक सहानुभूति प्रकट गरेका छन्।

“अरूको सेवामा आफ्नो साहसिक कर्तव्य निर्वाह गर्ने क्रममा ज्यान गुमाएका सबै सुरक्षाकर्मीका परिवारहरूप्रति पनि हाम्रो हार्दिक सहानुभूति छ,” राजा चार्ल्सको सन्देशमा उल्लेख छ।

उद्धार तथा राहत कार्यमा निःस्वार्थ रूपमा खटिरहेका सुरक्षाकर्मी, उद्धारकर्ता र स्वयंसेवकहरूप्रति पनि उनले धन्यवाद व्यक्त गरेका छन्।

प्रभावितप्रति विशेष सोच र प्रार्थना

राजा चार्ल्सले बाढीबाट प्रभावित सबै नागरिकप्रति आफ्नो विशेष सोच र प्रार्थना रहेको बताएका छन्। विपद्को यस कठिन घडीमा आवश्यकतामा परेकाहरूलाई सहयोग र समर्थन गर्न संयुक्त अधिराज्य बेलायत सधैँझैँ तयार रहेको उनको सन्देशमा उल्लेख छ।

नेपाल–चीन सीमा क्षेत्रमा आएको विनाशकारी बाढीले ठूलो मानवीय तथा भौतिक क्षति पुर्‍याएपछि विभिन्न देश तथा अन्तर्राष्ट्रिय समुदायले नेपालप्रति ऐक्यबद्धता जनाउँदै राहत, उद्धार र पुनर्स्थापनामा सहयोग गर्ने प्रतिबद्धता जनाइरहेका छन्।

Originally published on abcnews.com.np.