काठमाडौं । सामाजिक सञ्जाल टिकटक र फेसबुकमार्फत गरिएको स्वतन्त्र आह्वानपछि काठमाडौंको माइतीघर मण्डलामा रसुवा बाढीपीडितका लागि राहत सामग्री संकलन अभियान सुरु भएको छ।

सामाजिक सञ्जालमार्फत जानकारी पाएपछि काठमाडौं उपत्यकाका विभिन्न स्थानबाट सर्वसाधारण स्वस्फूर्त रूपमा राहत सामग्री लिएर माइतीघर मण्डला पुगेका छन्।

दक्षिणकाली, भक्तपुर, भैंसीपाटीसहित काठमाडौं, भक्तपुर र ललितपुरका विभिन्न स्थानबाट आएका मानिसहरूले कपडा, खाद्यान्न, खानेपानी, बिस्कुटलगायत अत्यावश्यक सामग्री सहयोगस्वरूप उपलब्ध गराएका छन्।

सानो सामाजिक सञ्जाल आह्वानबाट सुरु भएको अभियानमा उल्लेख्य जनसहभागिता जुटेको आयोजकहरूले बताएका छन्। कुनै ठूलो औपचारिक संस्था वा अभियानबिना सर्वसाधारण आफैं राहत सामग्री लिएर सहयोगका लागि जुटेका हुन्।

यसरी स्वस्फूर्त रूपमा संकलन भइरहेको राहत सामग्री आवश्यक व्यवस्थापनपछि रसुवा तथा अन्य बाढी प्रभावित क्षेत्रमा पठाउने तयारी भइरहेको जनाइएको छ।

विनाशकारी बाढीपछि प्रभावित नागरिकलाई खाद्यान्न, कपडा, खानेपानी तथा अन्य अत्यावश्यक सामग्रीको आवश्यकता परिरहेका बेला माइतीघरमा देखिएको जनसहभागिताले विपद्को घडीमा सहयोग र मानवीय एकताको उदाहरण प्रस्तुत गरेको छ।

Originally published on abcnews.com.np.