प्राप्त विवरणअनुसार सबैभन्दा बढी चितवनमा २२१ जनाको शव फेला परेको छ। यस्तै, नवलपुरमा १३४, गोरखामा ४४, धादिङमा ४०, नुवाकोटमा ३८, तनहुँमा २९, नवलपरासी पश्चिममा २८ र रसुवामा १३ जनाको शव फेला परेको प्रहरीले जनाएको छ।

उद्धार तथा खोजी कार्यका लागि प्रभावित क्षेत्रमा ४ हजार ४७३ जना प्रहरी परिचालन गरिएको छ। विपद्का क्रममा २७ जना प्रहरी कर्मचारी सम्पर्कविहीन रहेको प्रहरीले जनाएको छ। तीमध्ये एक जना मृत अवस्थामा फेला परिसकेका छन्।

बाढीका कारण घाइते तथा उद्धार गरिएका व्यक्तिको संख्या १ हजार ४७३ पुगेको छ। तीमध्ये रसुवाबाट ५७२, नुवाकोटबाट ८९८ र धादिङबाट तीन जनाको उद्धार गरिएको छ।

उद्धार गरिएकामध्ये काठमाडौँ उपत्यकाका विभिन्न अस्पतालमा उपचाररत तथा उपचारपछि डिस्चार्ज भएका घाइतेको संख्या १४ रहेको छ।

प्रभावित क्षेत्रमा नेपाल प्रहरीसहित सुरक्षा निकायले शव खोजी, उद्धार तथा राहतका कामलाई तीव्रता दिएका छन्। नदी किनार तथा तल्लो तटीय क्षेत्रमा समेत सम्भावित शवको खोजी भइरहेको प्रहरीले जनाएको छ।