काठमाडौं । रसुवाको भोटेकोसी र त्रिशूली नदीमा आएको भीषण बाढीमा परी मृत्यु भएकाहरूको शव वाग्मती, गण्डकी र लुम्बिनी प्रदेशका विभिन्न अस्पताल तथा स्थानमा राखिएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार हालसम्म विभिन्न स्थानबाट संकलन गरिएका ३९३ शवको पहिचान हुन सकेको छैन।

प्राधिकरणका अनुसार रसुवा, धादिङ, नुवाकोट, चितवन, तनहुँ, गोरखा, नवलपरासी, पाल्पा, रुपन्देही र कपिलवस्तुलगायतका जिल्लामा नदीले बगाएर ल्याएका शव फेला परेका हुन्।

रसुवामा फेला परेका तीन शव जिल्ला अस्पताल धुन्चेमा राखिएको छ। धादिङमा फेला परेका २७ शव पोखरास्थित अस्पतालमा तथा थप ६ शव शिक्षण अस्पतालमा राखिएको छ। नुवाकोटमा फेला परेका २३ शव पनि शिक्षण अस्पतालमा राखिएको प्राधिकरणले जनाएको छ।

सबैभन्दा धेरै शव चितवन क्षेत्रमा फेला परेका छन्। चितवनमा फेला परेका ११५ शव जिल्ला अस्पताल भरतपुरमा राखिएको छ भने २२ शव औद्योगिक व्यावसायिक विकास प्रतिष्ठानको भवनमा राखिएको छ।

यस्तै तनहुँमा फेला परेका नौ शव मणिपाल अस्पताल पोखरा र १९ शव गण्डकी अस्पताल पोखरामा राखिएको छ। गोरखामा फेला परेका २१ शव प्रदेश अस्पताल गोरखा तथा ११ शव गण्डकी अस्पताल पोखरामा राखिएको छ।

नवलपरासीका विभिन्न स्थानमा फेला परेका शव मध्यविन्दु नगर अस्पताल चोरमारा, गैँडाकोट नगर अस्पताल, मध्यविन्दु प्रादेशिक अस्पताल डण्डा तथा अन्य अस्पतालमा राखिएको छ। पाल्पा र पोखराका अस्पतालमा समेत शव राखिएका छन्।

पश्चिम नवलपरासीमा फेला परेका शव पृथ्वीचन्द्र अस्पताल परासीमा राखिएको छ भने रुपन्देहीको लुम्बिनी प्रादेशिक अस्पताल र भीम अस्पताल तथा कपिलवस्तुको पिपरा अस्पतालमा पनि शव राखिएको प्राधिकरणको तथ्यांकमा उल्लेख छ।

बाढीले बगाएर विभिन्न स्थानमा पुर्‍याएका शवहरूको पहिचान हुन नसक्दा चुनौती थपिएको छ। प्राधिकरणले फेला परेका शव संकलन गर्ने, सुरक्षित स्थानमा राख्ने तथा पहिचानका लागि आवश्यक प्रक्रिया अघि बढाउने काम भइरहेको जनाएको छ।

Originally published on abcnews.com.np.