काठमाडौं । शंकर ग्रुपले रसुवाको भोटेकोसी बाढीबाट प्रभावित नागरिकको राहत तथा पुनःस्थापनाका लागि प्रधानमन्त्री दैवी प्रकोप उद्धार कोषमा ४ करोड रुपैयाँ सहयोग गरेको छ।

शंकर ग्रुपका निर्देशक दीपा अग्रवाल तथा वरिष्ठ व्यवस्थापन टोलीले अर्थमन्त्रीमार्फत प्रधानमन्त्री राहत कोषका लागि उक्त रकमको चेक हस्तान्तरण गरेका हुन्।

नगद सहयोगसँगै ग्रुपले प्रभावित परिवारका लागि २५ लाख रुपैयाँ बराबरका २ हजार ५ सय टार्पोलिन टेन्ट समेत उपलब्ध गराएको जनाएको छ।

बाढी तथा विपद्का कारण ज्यान गुमाउनेहरूप्रति श्रद्धाञ्जली व्यक्त गर्दै शंकर ग्रुपले उद्धार तथा राहत कार्यमा खटिएका सरकारी निकाय, सुरक्षाकर्मी तथा अन्य सम्बन्धित पक्षप्रति आभार व्यक्त गरेको छ।

राष्ट्रिय संकटको घडीमा सरकार र नागरिकसँग काँधमा काँध मिलाएर उभिनु आफ्नो व्यावसायिक सामाजिक उत्तरदायित्व भएको ग्रुपले जनाएको छ।

विपद्बाट प्रभावित नागरिकको राहत, पुनःस्थापना तथा पुनर्निर्माणका लागि आगामी दिनमा समेत निरन्तर सहयोग गर्ने प्रतिबद्धता शंकर ग्रुपले व्यक्त गरेको छ।

Originally published on abcnews.com.np.