काठमाडौं । भोटेकोसी नदीमा आएको बाढी तथा त्यससँगै गएको पहिरोबाट ७ हजार ५७० वटा भवनमा क्षति पुगेको प्रारम्भिक तथ्यांक सार्वजनिक भएको छ।

सहरी विकास तथा भवन निर्माण विभागका महानिर्देशक रविन्द्र बोहराका अनुसार यसअघि ५ देखि ६ हजार भवनमा क्षति पुगेको अनुमान गरिए पनि पछिल्लो अद्यावधिक विवरणमा क्षतिग्रस्त भवनको संख्या ७ हजार ५७० पुगेको हो।

उनका अनुसार क्षतिको विवरण संकलन तथा वर्गीकरणको काम अझै जारी रहेकाले क्षतिग्रस्त भवनको संख्या थपघट हुनसक्नेछ।

नुवाकोटमा सबैभन्दा बढी क्षति

प्रारम्भिक विवरणअनुसार नुवाकोटमा ३ हजार ९७७ वटा घरमा क्षति पुगेको छ।

नुवाकोटको विदुरमा मात्रै ३ हजार २६, किस्पाङमा ६९६, बेलकोटगढीमा २९२ र तारकेश्वरमा ४३ घर क्षतिग्रस्त भएका छन्।

बाढी तथा पहिरोबाट नुवाकोटमा भएको क्षति अन्य प्रभावित जिल्लाको तुलनामा सबैभन्दा धेरै देखिएको छ।

रसुवामा १ हजार ७७९ घर क्षतिग्रस्त

रसुवामा १ हजार ७७९ घरमा क्षति पुगेको प्रारम्भिक तथ्यांक छ।

रसुवाको गोसाइँकुण्ड गाउँपालिकामा मात्रै १ हजार ४० वटा घर क्षतिग्रस्त भएका छन्। यस्तै, कालिकामा ११२, आमाछोदिङ्मोमा ५७ र उत्तरगयामा ५६७ घरमा क्षति पुगेको विभागले जनाएको छ।

धादिङमा १ हजार ४५१ घरमा क्षति

धादिङमा बाढी तथा पहिरोबाट १ हजार ४५१ घर प्रभावित भएका छन्।

बेनीघाट रोराङमा सबैभन्दा बढी १ हजार ३७, गल्छीमा १०७, गजुरीमा ८९ र सिद्धलेकमा २२८ घरमा क्षति पुगेको महानिर्देशक बोहराले जानकारी दिए।

गोरखा र चितवनमा पनि क्षति

यसैगरी, गोरखामा २६३ र चितवनको इच्छाकामना गाउँपालिकामा १६१ घर क्षतिग्रस्त भएको प्रारम्भिक विवरण छ।

गोरखाको गण्डकी गाउँपालिकामा २४८ र सहिद लखन गाउँपालिकामा १५ घरमा क्षति पुगेको विभागले जनाएको छ।

बाढी प्रभावित क्षेत्रमा विस्तृत प्राविधिक अध्ययन तथा क्षतिको वर्गीकरणपछि मात्रै पूर्ण क्षतिको यकिन विवरण आउने विभागको भनाइ छ। अहिले संकलित तथ्यांक प्रारम्भिक भएकाले थप विवरण प्राप्त हुँदै जाँदा प्रभावित भवनको संख्या परिवर्तन हुनसक्ने बताइएको छ।

Originally published on abcnews.com.np.