चितवन । पृथ्वी राजमार्गअन्तर्गत कृष्णभीरमा सडक भासिएपछि काठमाडौं उपत्यकामा देखिएको एलपी ग्यास अभाव हटाउन ग्यास उद्योगीहरू सक्रिय भएका छन्। नेपाल आयल निगमले उपत्यकाबाहिरका उद्योगमा ग्यास ‘बोटलिङ’ गरी वैकल्पिक मार्गबाट सिलिन्डर काठमाडौं ल्याउन अनुमति दिएपछि उद्योगीहरूले त्यसअनुसार आपूर्ति व्यवस्थापन अघि बढाएका हुन्।

नेपाल एलपी ग्यास उद्योग संघका अध्यक्ष दिवान चन्द, निवर्तमान अध्यक्ष शिव घिमिरे, पूर्वअध्यक्ष गोकुल भण्डारी र सदस्य विमल कालाखेतीलगायतले मकवानपुरका ट्रक व्यवसायीसँग छलफल गरी खाली सिलिन्डर बाहिर पठाउने र भरिएका सिलिन्डर उपत्यका भित्र्याउने व्यवस्था मिलाइरहेका छन्।

संघका पूर्वअध्यक्ष गोकुल भण्डारीका अनुसार उपत्यकाबाहिरका उद्योगमा खाली सिलिन्डरको संख्या कम भएकाले काठमाडौंमा रहेका खाली सिलिन्डर ट्रकमार्फत बाहिरका उद्योगमा पुर्‍याएर त्यहीँ ग्यास भरी पुनः काठमाडौं ल्याउनुपर्ने अवस्था छ। उनका अनुसार चितवनस्थित नेपाल ग्यास गण्डकीमा काठमाडौंका सिलिन्डरमा ग्यास भर्ने काम भइरहेको छ।

नेपाल ग्यासले सामान्य अवस्थामा काठमाडौंमा दैनिक करिब ११ हजार सिलिन्डर बिक्री गर्दै आएकोमा अहिले माग उच्च रहेकाले केही दिनभित्रै दैनिक ८ देखि १० हजार सिलिन्डर काठमाडौं ल्याउने तयारी गरिएको छ। सिलिन्डर अभावका कारण मागअनुसार ग्यास भर्न भने कठिन भइरहेको उद्योगीहरूले बताएका छन्।

संघका सदस्य विमल कालाखेतीका अनुसार अन्य उद्योगले पनि काठमाडौंका खाली सिलिन्डर उपत्यकाबाहिर लगेर बोटलिङ गरी वैकल्पिक मार्गबाट राजधानी भित्र्याउन थालेका छन्। बाबा ग्यासले श्री ग्यासका सिलिन्डर भरेर पठाएको छ भने साईबाबा ग्यासले आफ्नै सिलिन्डर काठमाडौं पठाएको छ। गैंडाकोटको जानकी ग्यासमा नौबिसेको श्रीराम, हेटौँडाको साहारा ग्यासमा एभरेष्ट र सुगम ग्यासको बोटलिङ गरी काठमाडौं पठाउने व्यवस्था मिलाइएको छ।

त्यस्तै, बनेपाको सगरमाथा ग्यासले परासीको चण्डी ग्यासमा तथा लोकप्रिय, सुपर र तारा ग्यासलगायतले राजधानीबाहिरका विभिन्न उद्योगमा ग्यास भरेर त्रिभुवन राजपथ हुँदै सिलिन्डर काठमाडौं पठाउन थालेका छन्।

अध्यक्ष चन्दका अनुसार सामान्य अवस्थामा काठमाडौंमा दैनिक करिब ४० हजार सिलिन्डर ग्यास आवश्यक पर्छ। तर अहिलेको असहज परिस्थितिमा माग बढेर दैनिक एक लाख सिलिन्डरसम्म पुग्न सक्ने अवस्था छ। उद्योगीहरूले केही दिनभित्रै आपूर्ति सहज हुने दाबी गरेका छन्।

एउटा ग्यास बुलेटमा करिब ४५० सिलिन्डर बराबरको ग्यास आउने गरेको छ। ठूलो ट्रकले भरिएका करिब ५०० सिलिन्डर र खाली अवस्थामा करिब ६०० सिलिन्डर बोक्न सक्ने उद्योगीहरूको भनाइ छ। नेपालका ५८ वटा ग्यास उद्योगबाट उत्पादित ग्यासमध्ये करिब ४० प्रतिशत उपत्यकामा खपत हुने गरेको छ।

साल्ट ट्रेडिङले पनि वैकल्पिक व्यवस्था मिलायो

साल्ट ट्रेडिङ कर्पोरेशन लिमिटेडले पनि खाना पकाउने ग्यासको आपूर्ति सहज बनाउन निजी ग्यास कम्पनीसँग सहकार्य गर्दै आफ्ना ‘एसटीसी सिलिन्डर’मा ग्यास भर्न थालेको छ।

कृष्णभीरमा त्रिशूली नदीको कटानका कारण पृथ्वी राजमार्ग अवरुद्ध भएपछि धादिङको जुगेखोलास्थित साल्ट ट्रेडिङको एलपीजी प्लान्टमा बुलेट पुग्न नसक्ने अवस्था आएको हो। त्यसपछि कर्पोरेशनले सहज स्थानमा रहेका निजी ग्यास उद्योगका प्लान्ट प्रयोग गरी आफ्ना खाली सिलिन्डरमा ग्यास भरेर वैकल्पिक मार्गबाट काठमाडौं ल्याउने व्यवस्था मिलाएको हो।

कर्पोरेशनले मनोज र बाबा ग्यासका प्लान्टसँग सहकार्य गरी ग्यास बोटलिङ सुरु गरेको जनाएको छ।

तर नेपाल आयल निगमबाट प्राप्त हुने ‘पिडिओ’ कोटा न्यून भएकाले साल्ट ट्रेडिङले चाहेर पनि पर्याप्त ग्यास बिक्री गर्न नसकेको जनाइएको छ। निगमले भारतीय आयल कर्पोरेशनसँग कुल ३ हजार २५ वटा ग्यास बुलेटका लागि सम्झौता गरेकोमा करिब दुई प्रतिशत अर्थात् ५३ वटा बुलेट मात्र साल्ट ट्रेडिङको भागमा परेको बताइएको छ।

साल्ट ट्रेडिङले हाल मासिक करिब ५५ हजारदेखि ६० हजार एसटीसी सिलिन्डर खपत गर्दै आएको जनाएको छ।

Originally published on abcnews.com.np.