काठमाडौं । साबिक विजेता बार्सिलोनाले स्पेनिस ला लिगामा आफ्नो विजयी यात्रालाई चौथो खेलसम्म कायम राखेको छ ।

आइतबार मेस्टाला रंगशालामा बार्सिलोनाले घरेलु टोली भ्यालेन्सियाविरुद्ध ५–० को जित दर्ता गरेको हो ।

बार्सिलोनालाई जित दिलाउन लामिन यामलले दुई तथा फेर्मिन लोपेज, कप्तान राफिन्हा र पेड्रीले एक–एक गोल गरे ।

खेलको छैटौँ मिनेटमा यामल गोलमार्फत बार्सिलोनाले अग्रता लिएको थियो । २२औँ मिनेटमा लोपेजले टोलीको अग्रता दोब्बर बनाए ।

दोस्रो हाफको सुरुआती पाँच मिनेटमै राफिन्हाले गोल गर्दा बार्सिलोना ३–० ले अगाडि बढ्यो । ७९औँ मिनेटमा पेड्रीले बार्सिलोनाको अग्रता ४–० मा पुर्याए ।

निर्धारित समय सकिन ६ मिनेट बाँकी रहँदा यामलले व्यक्तिगत दोस्रो तथा टोलीका लागि पाँचौँ गोल गरे ।

चौथो जितसँगै चार खेलबाट १२ अंक जोडेको बार्सिलोना शीर्ष स्थानमा उक्लिएको छ । पराजित भ्यालेन्सिया समान खेलबाट एक अंकका साथ पुछारमा छ ।

Originally published on abcnews.com.np.