काठमाडौं, १८ वैशाख । नेपाली फिल्म ‘कहीँ कतै’को गीत ‘झ्वाइयँ झान’ सार्वजनिक भएको छ । सचिन सिंहको सङ्गीत रहेको गीतमा सचिन र श्रृजना सिलालको स्वर रहेको छ भने गौरव दर्पणको शब्द रहेको छ ।

यो गीतका कोरियोग्राफर कविराज गहतराज हुन् । चलचित्रका अन्य गीतमा कमल राईको कोरियोग्राफी रहेको छ ।

कार्यक्रममा चलचित्रका प्रमुख कलाकारहरू शिवानी गिरी र सोनम बरफुङ्गपाको उपस्थिति थियो ।
’झ्वाँईय झान’ बोलको गीत यसअघि भारतबाट युट्युबमा रिलिज भईसकेको थियो ।

चलचित्र कहीँ कतैबाट शिवानी गिरी र सोनम बरफुङ्गपाले नेपाली चलचित्रमा डेब्यू गरेका छन् । मिस भारत र मिस हिमालयनमा फर्स्ट रनरअप भएकी नव नायिका गिरीको स्थायी घर सिक्किम हो ।

उमा फिल्म्स प्रा.लि.को प्रस्तुति रहेको फिल्म ‘कहीँ कतै’ लाई सबिर श्रेष्ठले लेखन–निर्देशन गरेका छन् भने चलचित्रमा दिलीप रायमाझी, किशोर खतिवडा तथा निर्मात्री उमा ‘बेबी’ गिरीको पनि प्रमुख अभिनय रहेको छ ।

यो चलचित्र साउन २५ गतेबाट प्रदर्शनमा आउने निर्माण पक्षले जनाएको छ । यस चलचित्रलाई काठमाडौं उपत्यकामा रिच ईन्टरटेनमेन्टका सञ्चालक करण श्रेष्ठ क्रेजीले वितरण गर्दैछन् भने काठमाडौं बाहिर एफ.डि कम्पनीले वितरण गर्दैछ ।