काठमाडौ, २१ जेठ । अभिनेता प्रदीप खड्का र निर्माता तथा निर्देशक मिलन चाम्सको केहि समय अघि सम्बन्ध बिग्रिएको थियो । मिडियासँग कुराकानीगर्दै मिलनचाम्सले प्रदीपलाई लगाएको विभिन्न आरोपले पनि यसलाई पुष्टि गर्छ ।

प्रदीपले सिनेमामा अघि बढ्नु छ भने आफ्ना धेरै बानी सुधार्नुपर्ने भन्दै उनले प्रदीपको पोल खोलिदिने समेत बताएका थिए । त्यही रिसमा मिलनले प्रदीपसँग कहिल्यै काम नगर्ने पनि बताएका थिए । तर प्रदीप यस विषयमा चुप रहे ।

तर हालै एक कार्यक्रममा दुवै संगै एकसाथ देखिए । सिनेमा ‘लिलिबिली’ले ५१ दिन मनाएको अवसरमा आइतबार आयोजना गरिएको सो कार्यक्रममा प्रदिप खड्का, निर्माता गोविन्द शाही, सुदिप खड्का र निर्देशक मिलन चाम्स एउटै स्टेजमा देखा परेका हुन् । कार्यक्रममा यसको निर्माणपक्षले केक काट्यो ।

स्टेजमा पुग्ने बित्तिकै मिलन र प्रदिपले एकअर्कालाई अंकमाल गरे । उनीहरुले एक अर्कालाई केक पनि खुवाइदिए । कार्यक्रममा प्रदीपले मिलनसँगको सम्बन्धको बारेमा बोल्दै दुश्मनलाई भन्दा पनि दुश्मनीलाई मार्नुपर्ने बताए। उनले भने,‘मेरो बिषयमा समाचार आएपछि मैले मिलन दाइलाई फोन गरेँ र कुरा गरेँ । सबैको आ-आफ्नो सोच हुन्छ, नयाँ कुराका लागि यस्तो सामान्य मतभेद भैहाल्छ ।’

प्रदिपले अगाडि भने,‘सम्बन्ध कहिल्यै पनि मर्दैन । दुश्मनलाई होइन कि दुश्मनीलाई सिध्याउन पर्छ । हाम्रो सोच पनि यही नै हो ।’

यसअघि प्रदीपसँग कहिल्यै काम नगर्ने बताउँदै आएका मिलनले कार्यक्रममा भने प्रदीपलाई सुहाउँदो कथावस्तु मिलेको खण्डमा प्रदीपसँग काम गर्ने बताएका छन् । उता प्रदीपले पनि सिनेमा निर्माणका क्रममा यस्ता घटनाहरु हुने भन्दै दुश्मनी मार्नुपर्ने बताएका छन् ।